Williamson-a'n Black Caps a chakpui

Over khat chiah a awm tawh tihin run riat siam a la ngai a, captain Kane Williamson chuan New Zealand hnehna a chanpui. Nilaini khan Black Caps hian wicket liin South Africa an hneh a, semifinal lut turin an dinhmun a ṭha hle. Proteas erawh match ruk an khelhah vawi khat chiah an la chak avangin an tlaah a ngaih theih.

Edgbaston, Birmingham-a inkhel hi ruahsur vangin a hunah ṭan theih a ni lo a, over 50 khelh tur pawh 49-ah an titlem. Proteas-in bat hmasain run 241/6 an vaw chhuak a, New Zealand-in ball thum chiah dah bangin target an umpha a, wicket liin an chak.

South Africa-in tun World Cup-ah beisei an pha lo a, insiam ṭha hret hret mah se, New Zealand hneh nan a tawk lo. Proteas tan hian Hashim Amla (55 off 83 balls, 4x4s) leh Rassie van der Dussen (67 not out off 64 balls, 2x4s, 3x6s) te che ṭha mah se Black Caps bowler-te an khel ṭha zawk a, run 241/6 an siam phak chauh avangin tunlai chhanah chhuanpui tham a tling lo.

New Zealand fast bowler Lockie Ferguson chuan wicket thum lain run 59 a pe a, all rounder Colin de Grandhomme hnathawh sawihmaih a thiang lo. Kum 32 mi De Grandhomme hian over 10 a vawm chungin run 33 lek a pe a, wicket khat a la tel. Hetah hian duh tawk mai loin ball 47 lekah run 60 a siam a, captain Kane Williamson lansarh vangin a chet ṭhatna hi thup boin a awm.

South Africa erawh an khel ṭha tawk lo a, an fixtures a fuh tawk lo bawk nen chhiarkawp dan thlapin la tla lo mah se semifinal beisei ngam chi a ni tawh lo. Proteas hian World Cup nomawi an la chawi ngai lo a, tun hma ang thoin tun ṭumah pawh beisei an phak lo.

New Zealand-in opener pahnih Martin Guptill (35) leh Colin Munro (9) te an chan hma a, captain Williamson tana harsatna belhchhah turin palina leh panganaa lut Ross Taylor leh Tom Latham ten run khat ve ve chauh an siam.

Awlsam taka chak tur Black Caps chu chak lo thei dinhmunah an ding. Williamson hian England captain Eoin Morgan anga six vaw pup pup ang ni loin 'cool' takin a vuak hun teah chauh a vua a, tawnhriat nei ṭha tih takah a dawh thei hle. A tawp over-ah chak turin run riat siam a la ngai a, Mitchell Santner chuan run khat a siam.

Williamson chuan Black Caps ṭantute lawmna siamin six a vua a, hemi innings bika a six vawi khat vuakna leh awmchhun a ni a, century a siamna chiah a ni bawk. New Zealand captain hian four vaw chhunzawm lehin 245/6 an siam a, wicket liin an chak.

South Africa captain Faf du Plessis chuan, "Kane khan a tihtur tak a ti a ni. Run siam a harsatin a nghak peih a, attack hun a thlang thiam," tiin a fak a, New Zealand captain hlui Jeremy Coney pawhin Kane a rilru huaisenna chu a fak bawk.