Del Potro a inhnukdawk

Juan Martin del Potro chu Queen's Club Championship aṭangin a inhnukdawk, Argentine tlangval hi grass court inelnaah hian a match hmasa zawkah hnehna chang mah se a khup hliam vangin a inlan chhunzawm thei dawn tawh lo.

Kum 2009 US Open champion Del Potro hi khup hliam vanga thla thum vel a chawlh hnuah May thla khan a rawn kir leh chauh a, London-ah hian seeded pathumna pek niin a match hmasaah Denis Shapovalov chu 7-5, 6-4 in a hneh.

Wimbledon inbuatsaihna tournament-ah Del Potro hi rinkai a ni phak a, tuna hliam a neih leh takah chuan July 1 aṭanga khelh tur grass court inelna lian berah pawh a dinhmun a chiang rih dawn lo tihna a ni. Kum 30 mi Del Potro chuan, "Hnehna chang chunga bul ka 

ṭan kha a lawmawm, a lawmawm loh lai erawh chu ka khup a na leh hi a ni. Ka chawlh chen tur a chiang lo a, a rei loh hram ka beisei," a ti. Argentine tlangval hi a banrek vei lam hliam chu tun hmain zai a lo ni tawh bawk.

Del Potro a inkhelh dawn tak lohah chuan a khingpui leh tur Feliciano Lopez chu last 16 inkhelh hah ngai loin quarterfinal a lut. Lopez hian a match hmasa zawkah Marton Fucsovics chu 6-7 (4-7), 6-3, 6-4 in a lo hneh ve thung.

Inkhel dangah Stan Wawrinka chuan Dan Evans 6-3, 6-4 in a hneh a, player dang Milos Raonic, Lucas Pouille, Jeremy Chardy leh Aljaz Bedene te pawhin round sang zawk an inhlangkai ve bawk. 

Greek rawlthar duhawm Stefanos Tsitsipas-a'n khawtual tlangval Kyle Edmund lakah 6-3, 3-3 a hma a hruai laiin khawdur leh light (eng) ṭha lo vangin tihtawp lailawk a ni. Nick Kyrgios leh Roberto Carballes Baena, Grigor Dimitrov leh Felix Auger-Aliassime te pawh an inkhelh hun sawn sak an ni.