2019 Africa Cup of Nations Zaninah khelh ṭan a ni dawn ta

Africa khawmualpuia ram leh ram, football hmanga an inelna sang ber Africa Cup of Nations (AFCON) chu zanin dar 1:30 hian khelh ṭan a ni dawn ta a, inelna thlengtu Egypt leh Zimbabwe ten match hmasa ber hi an khel ang. 

Egypt hi inelna thlengtu an nih piahlamah Mohamed Salah neitu an nih avangin champion tura rin hlawh ber pawl an ni a, player langsar tia sawi hluai tur nei lem lo Zimbabwe tan match hmasa ber aṭangin a harsa nghal dawn. 

AFCON hi July 19 thleng khelh tur a ni dawn a, ram 24 an inlan. Group parukah (A-F) team pali zel awmin ṭhen hran an ni a, group tina a sang pahnih chu round of 16 lut chiang an ni. 

Pathumna zinga a ti ṭha zual paliin last 16 hi an lut dawn bawk a, July 2-ah chuan league round hi khelh zawh vek a ni ang. 

Inelna thlengtu an nih avangin Egypt-in ngaihven an hlawh a, European football-a player 'hot' ber pawl Salah neitu an nih bawk avangin champion tura rinkai an ni. 

Liverpool forward Salah hian ram tan match 63-ah goal 39 a khung theih avangin Zimbabwe tan ngaihthah a thiang lo tih a chiang a, Salah chet fuh ṭum an tawn chuan an dinhmun a danglam dawrh thei ang. 

Tlarhmaa Salah a awm chung­in Egypt ṭhatna ber tia sawi ngam erawh tlarhnung a la ni reng a, ram tana vawi 88 inlan tawh, Aston Villa defender Ahmed El Mohamady leh West Brom ban rinawm Ahmed Hegazi-te hi fak an hlawh chhan an ni. 

Arsenal midfielder Moha­med El Neny hming lam hmaih a thiang lo a, season hman zawh taka Turkish Super Lig club Ka­simpasa tana goal 16 khungtu Trézéguet hi inkhel thlak danglam tur khawpin a ṭha bawk. 

AFCON-a Egypt kaihruaitu tur coach Javier Aguirre hian July 2018 aṭang khan Egypt hi a enkawl ṭan a, World Cup-a Egypt hruai thlengtu Hector Cuper a thlak. 

Kum 60 mi manager hian Egypt hi match riat chiah a la kaihruai a, vawi ruk chakpuiin vawi khat an khingpui an inhnehtawkpui a, vawi khat chiah an la tlawm - beiseina a sang hi a mak lo. Hei mai hi a ni lo. Mexico chu kum 2009 khan CONCA­CAF Gold Cup-ah a lo cham­pion pui tawh a, ram tana nomawi chawi lamah a mikhual lo - Japan a enkawl tawh bawk. 

Player a nih laia Mexico tana vawi 59 inlana goal 14 khung thei midfielder hian Atletico Madrid, Osasuna, Real Zaragoza leh Espanyol a lo enkawl tawh bawk - boruak sanga a team kaihhruai dan turah a buai lo ang. 

Player mal khaia lakchhuah tur pawh ni se Zimbabwe-in Egypt an tluk lo tih hai rual a ni lo a, mahse coach Sun­day Chidzambwa chuan an match apiangah result ṭha tak hlawh­chhuah an tum tur thu a sawi. 

Kum 67 mi African coach tawnhriat ngah chuan, "Egypt ṭhatzia kan hai lo a, mahni muala an fan-te nena an khelh phei chuan a danglam lehzual ang. Mahse, AFCON kan thleng tawh a, match tinah result ṭha thei ang ber neih tumin kan bei zel ang," a ti a, a hlau lo. 

Zimbabwe tan Egypt laka result ṭha hlawh chhuak tur chuan Knowledge Musona chet ṭhat a ṭul dawn a, Belgian club K.S.C. Lokeren striker hian ram tan goal 20 chuang a khung tawh. Musona chuan, "Zimbabwe tana khelh chuan kan ram mipui zawng zawngin min thlawp a, lawmthu sawilet theihna ṭha ber chu an tana theihtawp chhuaha beih hi a ni," a ti a, chak ngei a duh.