Neymar hremna a kaltlang dawn

UEFA chuan European football match thum khel thei lo tura hrem Neymar hremna chungchang ngaih­tuah nawn tura ngenna Paris St-Germain hnen aṭangin dawng mah se French club dilna an hnawl a, Neymar hremna chu kaltlangpui a ni dawn. 

Kum 27 mi forward hian season hmasa Champions League last 16-a Manchester United an ngam loh khan match official-te chu mawi lo takin social media lamah a sawisel - minute 94-naa United-in penalty an hlawhchhuah vang a ni. 

Hliam vanga Red Devils hma­chhawn thei lotu hian, "Thil zahpuiawm tak a ni. Football chinchang hre miah lo mi paliin television-ah, slow motion-in an ennawn a, thutlukna an siam a ni," a ti. PSG penalty hlawhchhuah chhan hi United player Diogo Dalot-a'n PSG defender Presnel Kimpembe kut a pet per vang a ni a, referee Damir Skomina chuan a tirah corner turin ti zet mah se VAR a rawn hnuah penalty a pe leh ta zawk a ni. 

Marcus Rashford chuan an penalty hlawhchhuah hi goal-ah a chantir a, PSG nen inkhel pahnih belhkhawmah 3-3 in inhnehtawk mah se away goal rule hmangin Red Devils an tlang zui a, Neymar hian hei hi a hrethiam lo. UEFA lamin Brazilian forward ṭawng­kaman pai dai thei bik lo - match thum atan an hrem zui a, PSG-in ngaihtuah nawn tura an ngenna pawh hnawl a ni zui. 

Neymar hian season tharah Cham­pions League group stage match thum a khel thei dawn lo nghal tihna a ni a, tun hnaiah PSG president Nasser Al-Khelaifi-a'n hming lam chiah loa a sawisel bawk avangin French club hi a chhuahsan a nih pawhin a mak lo ang. 

Khawthlang media te chuan Neymar hian Barcelona-ah kir a duh niin an sawi a, Lionel Messi chuan a ṭhian ṭha an neih let theihna tur a nih chuan Antoine Griezmann lakluh ai chuan Neymar neih let a duh zawk thu Barca hotute a hrilh niin an sawi bawk!