Lionel Messi goal a tawk lo

Argentina chhandam nan Lionel Messi goal khung a tawk zo lo a, world champion vawi hnih ni tawh hi Copa America group stage paltlang lo thei dinhmunah an ding mek - Pathianni zanlaiah Qatar nen an inhmachhawn leh ang.

Nimin zing khan Paraguay lamin Richard Sanchez hmanga first half-a an goal khung chu, second half-ah Messi-a'n penalty aṭangin a sut hram, ram pahnih hi 1-1 in an inhnehtawk. Paraguay defender Ivan Piris-a handball chu player zingah hmu leh sawisel awm lo mah se video assistant referee (VAR) a inrawlh a, Argentina-in an vanneihpui.

Group B inkhel dangah Colombia chuan Duvan Zapata (86') goal hmanga Qatar 1-0 a hnehin quarterfinal an lut, match hnih aṭangin point ruk an hmu a ni. Khelh zat inangah Argentina hian point khat chauh la hmuin a hniam berah an awm.

Argentina coach Lionel Scaloni chuan, "Inelna aṭanga kan la tla lo hi kan vannei. Paraguay khan min nawr hmasak berah an ti goal nghal, keini team ang hi chu match tina chak tura beisei kan neih avangin boruak tawn a harsatna chen pawh a awm ve ṭhin a ni," a ti a, chak ngei ngei an ngaih tawh thu a sawi bawk.

Copa America-ah hian group pathum zinga a sang pahnih ten quarterfinal an lut nghal a, hmunruak dang pahnih la awm chu group tina pathum zinga a ti ṭha pahnih ten an hnawhkhat ang. Argentina hi an dinhmun ṭha lo viau mah se an hma hun chu an kutah a la innghat.

Champion lai Chile-in an match hmasa berah Japan 4-0 in an sawp a, Inrinni zing dar 4:30-a an hmachhawn tur Ecuador an hneh leh a nih chuan an group team pali zinga khawng ber tura ngaih Uruguay an hmachhawn hmain knockout stage an lut ang.

Japan lakah Manchester United tana beisei phak lo Alexis Sanchez-a'n goal a khung bakah assist a nei leh tawh a, Arsenal forward hlui hian nuamti taka a inkhelh theih leh tawh thu a sawi avangin ven ngun a ngai dawn. Goal khung thiam striker Eduardo Vargas leh tawnhriat ngah Arturo Vidal an la nei bawk.

Chile coach Reinaldo Rueda chuan, "Kan team player zingah tawnhriat ngah an tam, champion lai kan nih bawk avangin huphurh kan nei lo. Match hmasa lama Sanchez khelh dan khan kan boruak nawmzia a lantir," tiin a sawi.