Uruguay leh Japan inhnehtawk

Japan midfielder Koji Miyoshi-a'n an ram chu vawi hnih ngawt hma hruai pui mah se goal an venghim tluan thei lo a, nimin zing khan Asian ram hi Uruguay nen 2-2 in an inhnehtawk.

Copa America champion Chile laka an tlawm hnuah Japan-in point an hlawhchhuah avangin quarterfinal beiseina an la nei. Nomawi chawi hnem ber Uruguay pawh hnehna an chan zawh loh avangin knockout stage ticket nemnghet tur chuan group match hnuhnung ber an nghah a ngai dawn.

Arena do Gremio-a inkhelah Japan lamin Miyoshi hmanga goal hmahruai an khung chu Luis Suarez-a penalty hmangin an sut. Penalty hi defender Naomichi Ueda-a'n Edinson Cavani a ven danah tihsual a nei tih video assistant referee (VAR) hmanga hmuh a nih vang a ni.

Second half-ah kum 22 mi, an ram league lama hming chher ṭantir Miyoshi bawkin hnai tak aṭangin goal a khung leh. World champion hmasa ber Uruguay lamin corner an hmuh chhawr ṭangkaiin Jose Gimenez chuan an si phurh sut nan a tauh lut.

Tukin hian group C match dangah Chile leh Ecuador an inkhel a, Chile hian hnehna an chang a nih chuan an tlang dawn. An group match hnuhnung berah Chile leh Uruguay an inhmachhawn dawn a, Asian team Japan leh Ecuador an inkhel ve leh bawk ang.

Japan coach Hajime Moriyasu chuan, "Chile nen kan inkhelh zawh khan, kan result hmasa ber kha kan team dinhmun hrilhfiah nan a tawk loh thu ka sawi. Tunah chuan a takin a lang ta, keini hian khawvel ram lian dangte hmachawn turin theihna kan nei ve tawk a ni.

"Uruguay hi khawvel team ṭha berte zinga mi an ni a, keini nen pawh kan inkhel tawk hle. Kan inhnehtawk avang hian kan player naupang zawk ten zirlai an zir chhuak thar dawn, inrintawkna an neih belh bawk ang," tiin a sawi.

Uruguay tana penalty khungtu Suarez chuan, "Tournament awlsam lo tak a ni, tihsual zeuh kan nei a nih chuan goal chhuah nghal zel theih a nih zia kan hrechiang thar chiang hle," tiin tumah team nem an awm bik loh thu a sawi ve bawk.