Brazil leh Argentina fiahna

South America khawmualpui chauh pawh ni lo, khawvel huapa football thiam ram Brazil leh Argentina ten Copa America khelh mekah beisei an phak lo hle. Football ram lian pahnih hian tun kartawp hian an group match hnuhnung ber an khel ve ve ang.

Copa America thlengtu Brazil-in an match hmasa bera Bolivia 3-0 a an hneh chungin fans lawmna an thlen zo chuang lo a, goal khung loa Venezuela nen an inhnehtawk ṭum phei chuan Tite naute hi an 'boo' khum hial.

Group A hmahruaitu Brazil hian zanin dar 12:30-ah Peru an hmachhawn dawn, fans ti lungawi tur chuan hnehna chan mai bakah goal tam zawk khung a pawimawh dawn. Roberto Firmino-a goal khung pawm a nih loh bakah, Liverpool forward hi Gabriel Jesus leh Philippe Coutinho te goal khung laia a lo offside avangin a ṭum a fuh lo hle.

Copa America hmasa khan Peru hian Brazil hi 1-0 in an hneh tawh a, tun ṭumah hian world champion vawi nga ni tawh Brazil hi rinkai zawk ni mah se pressure nei zawk an ni ang. Tite-a naute hian an match hnuhnung 16 zinga 13-ah goal an chhuah lo a, a venhim lam aiin a khung lam hi an buaina niin a lang. Neymar tel loin eng chen nge an thlen theih tih chu fiah a ni ang.

Group B-ah Argentina, Colom-bia, Paraguay leh Qatar an awm a, match hnih ṭheuh an khelh hnuah Lionel Messi te ram chuan point khat chauh hmun a hniam berah an awm mek. World champion vawi hnih ni tawh hian Pathianni zan dar 12:30-ah Asia champion Qatar an hmachhawn dawn.

Quarterfinal-ah group tina a sang pahnih an lut dawn a, anni hnung zui turin group tina pathumna zinga point hmu sang pahnih an tlang bawk ang. Argentina hi an dinhmun ṭha lo viau mah se an hma hun chu an kutah a la innghat.

Argentina captain Messi chuan, "Group hmahruaitu nih kan duh a, tunah chuan a theih tawh loh. Kan inkhelh leh tur hi kan thih leh dam hril tur a nih avangin tihsual neih a thiang lo, hnehna chang zo loa kan tla a nih chuan thil zahthlak tak a ni ang," tiin a sawi.