Real aṭanga Atletico pantu Llorente

Madrid khaw club inhal pahnih Real Madrid leh Atletico Madrid ten Ningani khan inremna an nei a, Real defensive midfielder Marcos Llorente chuan Atletico hi a pan.

Kum 24 mi midfielder man zat hi Spanish chanchinbu lar Marca chuan euro maktaduai 40 (pound maktaduai 35.65) tiin an tarlang. Llorente hian kum 2008 khan Real Madrid academy a zawm a, 2014-16 chhung chu B team lamah khelhtir a ni. Kum 2015 khan senior team tana a match hmasa ber a khel a, season hman zawh takah khan match 16-ah a inlan.

Santiago Solari enkawlna hnuaia Real an khelh lai khan Llorente hi player pawimawh pawl a ni hman a, mahse Zinedine Zidane kir hnuah erawh hmun a chang phak meuh tawh lo. Alaves lama season khat loan-a hun lo hmang tawh Llorente hian khel phak loa Santiago Bernabeu belh reng ai chuan chhuah a thlang a, duhtu tam tak awm mah se Atletico a thlang. 

Atletico midfielder Rodri chu Manchester City-in lakluh tumin an dawr mek a, Spanish club lamin a man zat atana an chhiar pound maktaduai 62.6 pek pawh an remti thlap tawh. Diego Simeone-a'n Rodri a chan dawn avang hian a hmun ruak luah tur a zawng a, an ṭhenawm club aṭangin Llorente a lalut ta a ni.