Australia chakna Warner century

Cricket World Cup champion lai Australia chuan Ningani khan Bangladesh chu run 48 in an hneh a, hnehna an chan theih nan David Warner chuan run 166 zet a vaw chhuak.

Aussies-in match ruk khel tawhin point 10 an hmu a, semifinal lut turin an dinhmun a ṭha. Tigers erawhin an elpui zinga mi Australia an hneh loh avangin knockout stage luh a harsa dawn. 

An inkhelhna hmun Trent Bridge-ah hian Australia an mualpho tawh a, nikum June thla khan England nen inkhelin mualneitu hian bat hmasain run 481 zet an siam.

Tun thlengin run 481 hi ODI record a la ni reng a, England tho hian helai hmunah hian 2016 khan Pakistan lakah run 444 siam bawkin ODI-a run siam tam pahnihna a la ni cheu. Batsman-te chet ṭhatna hmun a nih avangin toss-a chak zawk nih a pawimawh a, rin lawk ang ngeiin ṭhumvawra vannei Australia-in bat hmasak an thlang.

Australia opener pahnih Warner leh captain Aaron Finch te partnership chu run 121 a ni a, over tina run ruk bawr vel an vuak phak avan dinhmun a ṭha. Amaherawhcu, Warner hian dinhmun ṭha ringawt duh tawk loin ball 147-ah run 166 a siam. 

Batsman huaisen Warner hian ṭum danga a tih ṭhin angin sang taka zuangin a century siam hi a lawm a, ball tampering vangin mualpho mah se tunah chuan Australia fapa rangkachak a ni chho leh ta. Pathumnaa lut Usman Khawaja hming lam hmaih a thiang lo a, run 89 zet a siam ve bawk.

Australia hian over 50-ah run 381/5 zet an siam a, an mualphona tawhna aṭanga inzirin tun hnai team ṭhang duang tak Bangladesh tan pawh umphak rual a ni lo. 

Bangladesh-in an target sang mah se beiseina nung an nei a, Soumya Sarkar (10) a thi hma nachungin Shakib Al Hasan (41), Mushfiqur (102*) leh Mahmudullah (69) ten run an siam tam avangin over 50-ah run 333 an vaw chhuak.

Tigers chak loh dan thlirin team remchang apiangin a hneh ṭhin kha an ni tawh lo. Table thlir phei chuan panganaah an awm a, table mawnghphaha awm Afghanistan khaikhin phak an ni tawh lo - Sri Lanka, West Indies, South Africa leh Pakistan te an elpha der tawh.

Australia-in run an siam tam a, Bangladesh lakah chak tur zawk ni mah se knockout stage chinah chuan tun aiin over tir lama run an siam tam a pawimawh ang.

Aussies hian England (June 25), New Zealand (June 29) leh South Africa (July 6) te an la hmachhawn dawn a, India an hneh tawh loh avangin team ṭha dang an hmachhawn tur hi fiahna tak tak a ni dawn.

Bangladesh-in an ram ṭhenawm pathum Afghanistan (June 24), India (July 2) leh Pakistan (July 5) te an la hmachhawn dawn a, semifinal beiseina an la neih avangin an chunga awm Men in Blue nena an inkhel tur hi a pawimawh thei ang.