Hmeichhe World Cup Round of 16 khel tur a hriat kim ta

France-a khelh mek Hmei­chhe World Cup-ah Ninga­ni zan khan league round khelh zawh a ni ta a, last 16-a inhma­chhawn tur a hriat kim ta. 

Match hmasa pahniha hnehna chang zo lo Cameroon chuan an match tawp berah 2-1 a New Zealand hnehin last 16 an lut a, Argentina beiseina erawh a thamral nghal. Chak mamawh Chile-in 2-0 in Thailand hneh mah se anmahni anga point thum nei ve tho Nigeria chu goal difference-ah an phak lo a, pathumna ti ṭha pali zingah an tel ta lo. 

Group paruk aṭangin group tina a sang pahnih chu round of 16 lut chiang sa an ni a, pathumna zinga a ti ṭha zual paliin knockout round hi an lut ve bawk. 

Last 16 lut turin Came­roon-in chak ngei ngei an mamawh a, an mamawh ang ngeiin an chak - injury time minute nganaah chakna goal hi an khung ve chauh a, an vannei takzet. 

Cameroon tan Ajara Nchout chuan minute 57-naah goal hmahruai a khung a, hun tawp nan minute 10 chauh a awm tawh tihah New Zealand-in Aurelle Awona 'own goal' hmangin si phurh an sut. Last 16 luh beisei Came­roon beiseina a chuai a, goal an chhuah hian minute 10 chauh a awm tawh - inkhel tawp se World Cup mangṭha tur an ni. 

Mahse, hun pek belh mi­nute nganaah Nchout bawkin goal a rawn khung leh a, 2-1 in an chak - last 16-ah champion beisei England nen an inhmachhawn ang. 

Cameroon-in hnehna an chan avangin Chile-in si thum fai tala chak an mamawh tih an inhria a, Thailand chu 2-0 in an hneh - goal khatin last 16 an lut lo. 

Chile hian goal khat chauh pawh khung belh se 'pathumna' table lama an chunga awm Nigeria chu goal difference-ah an tluk chiah ang. Chutah tak chuan goal khung hnem zawk en leh tur a ni a, Chile-in goal hnih khungtu Nigeria an lehpelh theihna a ni. Mahse, an khung belh lo miau a, an match hmasa pahnih result-in Chile a hrem. 

Group hmahruaitu nih inchuhna inkhelah USA chuan 2-0 a Sweden hnehin Group F-ah hmahruaitu an ni a, Netherlands chuan 2-1 a Canada hnehin Group E hmahruaitu an ni bawk. 

Round of 16 hi zanin dar 9:00-ah khelh ṭan nghal tur a ni a, Group B-a an khingpui pathum hneh vek chunga last 16 lut Germany leh Nigeria an intawng ang - Super Eagles hi pathumna nichunga last 16 lut an ni. 

Zan dar 12:30-a Norway leh Australia inkhel tur pawh en chakawm tak a ni. Norway hi group stage-a Nigeria leh South Korea hnehtu an ni a, Australia hi Brazil meuh hneh thei an nih avangin an ṭha tih a chiang bawk. Cameroon-in vannei takin last 16 an lut a, hmeichhe team ṭha Japan meuh hneha match thuma chak vek England chu Pathianni zan dar 9:00-ah an hmachhawn dawn. An vannei zel dawn em - kan hre thuai dawn. 

Pathianni zan dar 12:30-a France leh Brazil inkhel tur hi en chakawm ber zinga mi a ni - France hi an thiam piahlamah inelna thlengtu an ni a, last 16-a Brazil hmachhawn nghal erawh an ṭawngṭaina a ni bik lo ang.