India league sang ber tur ISL? I League a tawp dawn?

I League fan-ten niminah thu thin ṭhawng leh hriat nuam lo tak an hria a, chu chu season thara Indian Super League-in division sang ber dinhmun an luah tur chungchang a ni. 

All India Football Federation (AIFF) general secretary Kushal Das chuan, "A tira kan inbiaknaah chuan ISL hi league sang ber nih tir turin kan inrem," a ti a, thu an lo thlun tawh dan a sawi chhuak.  AIFF leh IMG Reliance ten vaibelchhe 700 man hu contract an ziah khan Kushal Das-a sawi ang hian inremna an lo ziak tel a, tih hlawhtlin an tum ta niin a lang. 

ISL hi top division a nih dawn chuan I League a tawp a ṭul dawn tihna a ni a, Kushal Das-a thusawi avang hian Indian football 'chiri' tak a buai zual leh ta. 

Kum 2010 khan AIFF hian IMG nen hian kum 15 chhung atan contract an ziak a, Indian FA hi vaibelchhe 700 lawihin a hausak belh - a hunlaia Indian football dinhmun nen ngaihtuah chuan tam tak a ni. 

Pawi ta erawh inremna hian nasa takin I League a nghawng. AIFF hian ISL din phalna IMG a pe tel nghal a, a kalphung tur leh ruahmanna zawng zawng chu IMG hi an pa pek vek! Kum 2013-ah ISL siam tur hian IMG-in thutlukna a siam zui a, Star Sports chu thawhhonaah an tel bawk - kum 2014 aṭangin ISL khelh ṭan a ni nghal. 

Kushal Das chuan, "A tir takah chuan inelna hi kal phawt se kan ti a, kum nga a liam takah chuan kan inremna hi tih hlawhtlin a ngai a ni," a ti - thla tharah AIFF executive committee an ṭhukhawm dawn a, he thil hi an ngaihtuah ang.  

IMG leh Indian FA inremna aṭanga a lan dan chuan ISL hi league sang ber a nih dawn chuan I League tih tawp a ṭul - hei hi contract-ah an ziak tel.

He thu lo hre lawk hian I League club tam takin a thlawna sum sen an duh lo a, club an lo titawp tawh - Dempo, Salgaocar, Sporting Clube de Goa, Pune FC leh Royal Wahingdoh te chu he thil avanga club titawp tawh langsar an ni. 

May 2016 khan AIFF chuan he an ruahmanna hi an lo pholang tawh a, ISL hnuai chiaha awm turin League One a awm tur thu an sawi. 

AIFF senior vice president Subrata Dutta chuan he ruahmanna chungchang hi Vanglaini a lo hrilh tawh a, ISL-ah relegation a awm dawn loh avangin League One club dinhmun a chau dawn hle. 

I League club paruk Aizawl FC, NEROCA FC, Gokulam Kerala, Churchill Brothers, East Bengal leh Minerva Punjab-te chuan an hma hun chiang lo reng avangin Super Cup an khel duh lo tawh. 

He thil avang hian AIFF chuan sum tam tak an hloh thu an sawi a, club-te hi nuai 10 ṭheuh chawi turin a ti a, East Bengal bik hi nuai nga chawi turin an ti. Tun hnaiah AIFF hian sum chawi tur hi a tihsan belh a, nuai 27.5 ṭheuh chawi turin I League club te hi an hrilh - club-te hian hei hi hrethiam loin dan angin AIFF hi khin an tum nia sawi a awm. 

I League chauh a buai lo. Tun hnaiah ISL club Pune City chuan player hlawh an pek theih loh avangin an talbuai a, AIFF hial inrawlh a ngai bawk - tuna thil chiang ber chu 'engmah a chiang lo' tih hi a ni rih!