Vawiinah India leh New Zealand inlan dawn

Cricket World Cup khelh meka hneh loh la tawng lo pahnih India leh New Zealand te chu vawiin hian an inlan dawn.

India leh Afghanistan te vawiin tlai dar 3:00 hian Ageas Bowl, Hampshire-ah an inkhel dawn a, Old Trafford Cricket Ground, Manchester-ah West Indies leh New Zealand te zanin dar 6:00-ah an inkhel bawk ang.

Men in Blue tan Afghanistan hneh hi chiang sa tura ngaih a ni. Chutihrualin tun World Cup-ah Shikhar Dhawan a inlan theih dawn tawh loh avangin KL Rahul en chik a ni dawn a, inhliam Bhuvneshwar Kumar aia lut Mohammed Shami-a'n India ṭantute mit a la bawk ang.

Champion rinkai zinga mi Black Caps leh West Indies inkhel hi cricket thlirna aṭanga teh chuan inkhel hmuhnawm tur zawka ngaih a ni. Windies hi tun hma angin an ṭha tawh lo a, player ṭha ṭhin Chris Gayle chefuh hlei thei lo te chu tun World Cup-a an chet ṭhat lohna chhan a ni.

Hetihlai hian New Zealand erawh batting leh bowling department an che ṭha rual a, captain Kane Williamson hoin Windies an hneh ngei a rinawm hle. Pathianni tlai dar 3:00-ah Pakistan leh South Africa te an inkhel dawn a, semifinal beiseina chhi nung rih turin chak an mamawh dun hle.