Siami telna India hmachhawn tur Chile

Vawiin chhun dar 12:15 hian Women's FIH Series Finals khelh mek chu semifinal khelh a ni dawn a, Mizo nula Lalremsiami Hmar telna India leh Chile ten final luh an inchuh ang.

Tun tournament khelh laia final lut team pahnih chuan Tokyo Olympic qualifier an khel thei dawn, infiamna khawmpui lian zinkawng bul ṭanna a nih avangin a pawimawh hle. Semifinal lehlamah a thlengtu Japan leh Russia an inhmachhawn thung dawn a ni.

Japan khawpui pakhat Hiroshima-a inelna neih mekah India nulate an che ṭha tluang a, group match thum an khelh tawhah hnehna an chang vek. Heng inkhel pathumah hian Siami a inlan kim a, goal hnih a khung tawh. Siami pa Lalthansanga chu June 21 zing khan Kolasib-ah heart attack vangin a boral. Tournament khela thang mek Siami chuan a pa ruang hi a thlah ve thei lo.

Siami chuan, "Tunah haw mah ila ka pa ruang ka nang tawh dawn lo a, ram tan inkhel tlang ila ka pa pawh khan min chhuang zawk ang," tiin tournamernt khel tura awm tlang a tum. Vawiin inkhel pawimawhah hian Siami hi an hahchawlhtir dawn nge an khelhtir dawn a la hriat loh a, "Min hmangaihtute ṭawngṭaipuina ka ngen," tiin Vanglaini kaltlangin Mizo mipuite ṭawngṭaipui turin a sawm.