Hlawhtling takin Jeje-a an zai

India international striker Jeje Lalpekhlua chu Ningani khan Sri Ramachandra Institute of Higher Education and Research, Porur, Chennai-ah hlawhtling takin a khup an zai.

Jeje hi khup na vangin hun rei tak harsatna a nei tawh a, Dr Arumugam. S hian hlawhtling takin 'arthroscopic knee surgery' hi a nei a. Mizo tlangval chuan, "Ligament a lo ṭha vek a, beisei aia hmain ka inkhel leh thei ang," tiin Vanglaini a hrilh.

Chennaiyin FC striker Jeje-a khup an zaina hi ni 10 hnuah a ṭhuina an phelh ang a; doctor sawi dan chuan thla li hnuah a inkhel leh thei dawn a, Jeje-a hian season ṭantir lam bak a chawlh a ngai dawn lo. Jeje hian India tan match 53 khel tawhin goal 23 a khung tawh. Glub inelnaah pawh India rama inelna lian Indian Super League, I League leh Federation Cup-ah te a champion vek tawh a; nimahsela season hmasa kha hliam nei chungin a inkhel tluan a, a khup nâ avangin kum dang angin a che tha lo.