India rama university ṭha tehnaah Mizoram University 21-na a ni
Mizoram University (MZU) chu India Today leh an thurualpuite'n general line (course) zirna bika India rama university ṭha an tehnaah university ṭha 21-na a ni a; Jawaharlal Nehru University, New Delhi chu university ṭha ber a ni. Kum thum kal ta chhunga thil thar an hauh (patent) zat tam lamah MZU chu pathumna a ni bawk.
Tehna hrang hranga point hmuh zat belhkhawmin, JNU, Delhi chu India rama university ṭha ber a ni a; University of Hyderabad leh Aligarh Muslim University-te chu pahnihna leh pathumna an ni. A ṭha zual panga zingah Osmania University, Hyerabad (palina) leh University of Calcutta (pangana)-te an lang.
India Today-in university ṭha zual a tarlan 36 zingah Gauhati University, Guwahati chu 11-na a ni a, he university hi India hmarchhak biala university zingah MZU-in a tluk loh awmchhun a ni. India Today tarlan zingah Assam University, Silchar chu 23-na a ni bawk.
Kum thum kal ta chhunga thil thar patent zat tam lamah hian University of Calcutta (116 patents) chu pakhatna a ni a, patent 38 neitu Acharya Nagar Juna University, Guntur, Andhra Pradesh chu pahnihna niin, patent 24 neitu MZU chu pathumna a ni. JNU, Delhi (21 patents) leh Mahatma Gandhi University, Kottayam (20 patents) ten an dawt.
University ṭha an tehnaah hian tehfung leh point pekna hrang hrang a awm a; chu'ngte chu Intake Quality & Governance, Academic & Research Excellence, Infrastructure & Living Experience, Personality & Leadership Development, Career Progression & Placement, Objective Score leh Perceptual Score tihte a ni.