Mumbai City-in ISL final khel dawn

March 13 zana Indian Super League final khel turin Mumbai City chu an inpet tling ta - Mumbai club hian FC Goa chu penalty-ah 6-5 a hnehin final hi an lut. 

Semifinal first leg-ah team pahnih hi 2-2 in an lo inhnehtawk tawh a, GMC Stadium-a second leg inkhelah goal a lut lo thung - penalty hmanga chak zawk zawn a ni a, Goan club an vanduai. 

Nizan khan ISL semifinal inkhel dangah NorthEast United leh ATK Mohun Bagan an inkhel a, he thu buatsaih a nih lai hian result kan hre hman lo. 

ISL semifinal-a team pahnih intawn hmain league round lama roreltu Mumbai City chu chak tur chianga dah an ni a, mahse, beisei ang ngawt erawhin thil a kal lo. 

First leg-a team pahnih intawnnaah pawh Mumbai club hi si phurh suttu zawkah ve ve an ṭang a, Thawhṭanni zan inkhelah pawh target-a an shot hmasa ber nei turin minute 89-na an nghah thlen a ngai. 

Goan club tan Alberto Noguera, Redeem Tlang, Jorge Ortiz, Alexander Jesuraj leh Raynier Fernandes-ten chance duhawm an nei vek a, Mumbai erawh inkhelh chhung zawngin vawi khat bak target-ah shot an nei lo. 

ISL-ah away goal rule hman a ni lo a, minute 90 chhunga goal a luh loh avangin extra time khelh zui a ni - extra time-ah pawh team pahnihin goal an khung thei lawk lo a, penalty pet a ngai dawn tih a lang ṭan. 

Coach pahnihin goalkeeper an thlak ve ve a, Mumbai tan Shillong Lajong keeper hlui Phurba Lachenpa chuan Amrinder Singh a thlak a, FC Goa tan Naveen Kumar chuan Dheraj Singh a thlak thung. 

Lachenpa hian Edu Bedia penalty pet a dang nghal a, vawi kua zet team pahnihin penalty an pet meuh chuan a tawpah Mumbai City chu 6-5 in an chak.