Liverpool beiseina awmchhun:Champions League

Premier League champion Liverpool tan champion nomawi humhim beiseina a bo tawh a, season tharah Champions League an khel phak ang em? tih chu zawhna awm mek a ni. 

Reds-in an season duhawm lo tak thup mawi nana beisei an la neihna awmchhun chu Champions League a ni a, zanin dar 1:30 hian last 16 second leg khel turin RB Leipzig an mikhual dawn.

Liverpool hian first leg-ah 2-0 in hnehna an lo chang tawh a, Mohamed Salah leh Sadio Mane-ten goal khat ve ve an khung - tun hnaia an 'form' ngaihtuah erawh chuan Liverpool hi tlang tura dah sa bik a rem lo ang. 

Covid-19 dan avangin Liverpool hian Anfield-ah German club hi an mikhual thei dawn lo. Leipzig hi United Kingdom-a inkhel tura an zin chuan Germany-a an kir hunah ni 10 chhung an inkhunghran a ngai dawn. 

Hei vang hian UEFA chuan ruahmanna a siam a, Budapest khawpuiah Reds chu an home match khel mai turin an ti - Reds fans tan chuan a lawmawm zawk hial mai thei!

Liverpool hi Anfield-ah league match ruk zet chu a zawnin an tlawm tawh a, match riat chhung chak an nei tawh lo bawk - fan-te chuan he Anfield anchhia hi an en ang a, Budapest-a inkhelh tur hi an lawm zawk hial mai thei. 

Premier League-a Liverpool dinhmun inhrilh nawn a ngai lo a, Champions League last 16 aṭangin an tla leh a nih ngat chuan khawih chet thiang lo anga ngaih coach Jurgen Klopp ban chungchang sawi rik a nih pawhin a mak lo ang. 

German coach chuan, "Quarterfinal kan lut thei a nih chuan ka player-teah inrintawkna a tuh leh ang," tiin inkhel tur a thlirlawk a, Champions League-a chak chu league lama an result atan pawh a ṭhat tur thu a sawi. 

Reds tan Fulham laka an tlawm ṭuma inlan thei lo  Roberto Firmino leh Ozan Kabak chu lo kir leh thei tawh tura beisei an ni a, Jordan Henderson, Virgil van Dijk, Joe Gomez  leh Joel Matip-te chu inlan thei lo tur chiang sa an ni. 

RB Leipzig leh Liverpool thawnthu a danglam rih hle - German club hi inelna hrang hranga an match hnuhnung pakuaah vawi khat chiah an tlawm a, an chak loh hi first leg-a Reds an ngam loh kha a ni. 

Leipzig hi an league match hnuhnung parukah an chak vek a, Bundesliga table-ah pahnihna an ni mek - an chunga awm Bayern Munich chu point hnih chiahin an phak lo mek. 

Julian Nagelsmann-a enkawl team hian league-a vawi khat an intawnah Bayern inhnehtawkpuiin Champions League group stage-ah Paris Saint-Germain leh Manchester United an hneh tawh bawk a, Liverpool laka 'comeback' turin an ṭha tawk. 

Klopp-a'n Fulham laka bench-a a dah Fabinho, Trent Alexander-Arnold leh Thiago Alcantara-te bul a ṭantir a rinawm a, player pathum hi game thlak danglam thei khawpa player ṭha bik an ni. 

Reds tana pawimawh ber erawh tlarhma lama Mohamed Salah leh Sadio Mane-te ke a 'hmui' leh hi a ni a, player pahnih hian an theihna anga an khel chhuak a nih phawt chuan Kop tan manganna tur a awm lo ang. 

Salah hian tun season-a match 38-a khelhah goal 24-a khung tawh a, assist vawi li a nei bawk - Mane hian match 35-ah goal 11 khungin assist vawi nga a nei thung. 

Leipzig tan full back pawimawh, tun season-a goal riat khung tawh Angelino dinhmun he thu buatsaih thleng hian a la chiang lo a, Marcel Sabitzer leh Willi Orban-te dinhmun a la sawi theih loh bawk. 

Sabitzer hian tun season-ah goal ruk khunga assist vawi ruk a neih avangin Leipzig tan a 'dam' a pawimawh a, Marcel Halstenberg, Konrad Laimer leh Dominik Szoboszlai chu inlan thei lo chiang an ni. 

Kum 23 mi Christopher Nkunku hi tun season match 28-a goal sarih khunga assist vawi riat nei a nih avangin Liverpool tlarhnung tan ven bik a fuh dawn a, match 32-a goal 11 leh assist pasarih nei thei Yussuf Poulsen hi theihnghilh loh a ṭha bawk.