Germany leh Low inṭhen dawn

Joachim Low chuan European Championship zawhah Germany enkawl hna a bansan dawn. Kum 61 mi Low hian World Cup 2006 zawh khan Jurgen Klinsmann a thlak a, tun thlengin Germany national team a enkawl.

Low hian World Cup 2022 thleng daih contract nei mah se German Football Association (DFB) biain a contract hi a titawi. German coach Low chuan, "Uluk takin thutlukna ka siam a, ka hnathawhah ka lungawi hle," tiin a sawi a, World Cup 2014-ah an ram hi a champion pui avangin a record hi a chhuanawm hle.

Chutihrualin World Cup nomawi an chawi hnuah Germany an tla hniam a, 2016 Euro semifinal thleng mah se 2018 World Cup-ah group stage an paltlang lo. Low chuan, "Hlawhtlinna duhawm tak tak kan chang a, hun hrehawm tak hmachhawn ṭum ka nei bawk," tiin a sawi a, Euro 2020-ah phur taka inelna an hmachhawn tur thu a sawi.

Germany hi group F-ah France, Hungary leh Portugal te nen an awm ho a, Euro C'ship hi kumin June 11 leh July 11 chhungin khelh a ni ang.