Goal nga khung Brazil an chungnung

Copa America thlengtu Brazil chuan fans lungawina tur ngeiin an khel chhuak ta, coach Tite-a'n a tiam lawk ang ngeia goal khung hnemin Peru 5-0 in an sawp a, harsatna nei loin quarterfinal an lut.

Group A aṭangin Brazil leh Venezuela te an tlang a, pathumna Peru chuan point li hmuin group danga mite result an ngaihchan tel a ngai dawn. Group C aṭangin match hnih chauh khelh chinah champion lai Chile leh Uruguay te an tlang chiang tawh bawk a ni.

An match hmasa pahnihah Brazil-in beisei an phak lo a, Venezuela laka goal an khung loh ṭum phei chuan fans lamin an 'boo' hial. Group match hnuhnung ber an khelh hmain Tite-a'n Brazil tak tak an lan chhuahtir tur thu a sawi a, a sawi dik.

Nimin zing Sao Paulo-a inkhelah Roberto Firmino-a'n lehlam hawi chungin (no-look) goal a khung. Peru keeper Pedro Gallese-a ball petchhuah turin box sira awm Firmino hnung a per hnuah goal ban fuhin a rawn let leh chu Liverpool forward hian a changfuhin keeper a bum hnuah en loin goal a khung a ni.

World champion vawi nga ni tawh tan hian Casemiro-a'n goal hmahruai (12') a khung bakah, forward Firmino (19'), Everton (32'), Dani Alves (53') leh Willian (90') ten a khat mawi tawkin goal an khung. Attacking football hmuhnawm en chaka pungkhawm mipui mit an ti tlai a, sawiseltute ka an hupsak bawk.

Peru sawp chunga quarterfinal an luh hnuah Tite chuan a naute khelh dana a lungawi thu a sawi. Brazil coach chuan, "Kan ram team ka enkawl hnua kan khelh ṭhat ber ṭum zinga mi a ni, khelmual a ṭhat chuan ṭha taka khel tura min puitu pawimawh a ni thei tih pawh a lang.

"Match tinah vawi 600 vel zel ball kan inpe kual ṭhin anga chhut a ni a, mahse kan goal khung a tlem tlat si. Peru lakah erawh kan theihna leh nihna tak a lang. Goal kan khung hnem hian inrintawkna min pe a, match lehpekah pawh hetiang zel hian khelh kan tum," tiin a sawi.

Brazil hi group hmahruaitu an nih avangin quarterfinal-ah team nem zawk hmachhawn thei tura ngaih an ni. Group tina a sang pahnih an tlang a, group pathuma pathumna ni zinga pahnih an tlang dawn bawk. Group B emaw C-a pathumna an hmachhawn ang.

Nizan khan group B team pali ten an match hnuhnung ber an khel, an group aṭangin Colombia an tlang chiang tawh. A hniam bera awm Argentina chuan Qatar an hneh a nih chuan tlang theihna hun an la nei a, a thlengtu Brazil nen inhmachhawn thut thei an ni.

Alexis Sanchez chuan Copa America a khelh ṭhat chhawm nung zelin goal a khung leh ta. Manchester United forward hian an ram chu Ecuador lakah 2-1 a hnehna chanpuiin quarterfinal a hruai kai.

Inrinni zan Fonte Nova Arena-a inkhelah forward Jose Fuenzalida-a'n minute riatna lekah goal hmahruai a khung, chawlhlawk hmain Ecuador tan forward Enner Valencia chuan penalty aṭangin a sut. Second half-ah Sanchez chuan chakna goal mawi takin a 'chip' lut.

Ecuador defender Gabriel Achilier chu hun tawp dawnah hnawhchhuah a ni a, match hnih an khelh aṭanga point an la hmuh loh avangin an beiseina a thamral a ngaih a ni. Match hnuhnung bera Japan an khelh hunah hnehna changin point thum hmu pawh ni se, group dang inkhel result an ngaihchan tel a ngai tawh.

Chile tana goal 43-na khungtu Sanchez chuan, "Ka ke a ulh deuh a, mahse a nasat loh hram ka beisei. Inkhel chawhnu lamah kha chuan nuam lo deuh chungin ka inlan, ram tan a nih tawh chuan eng hunah pawh theihtawp chhuahin kan khel ṭhin a ni," tiin a sawi.