Semifinal-ah Kerber a tla

Inrinni zan khan world number 1 hlui Angelique Kerber chu Belinda Bencic hneh loin Mallorca Open semifinal aṭanga vuak tlak a ni a, a inkhelh thiamna grass court-ah beisei angin a khel chhuak rih lo.

Centre Court-a inkhel-ah Kerber hian a tir lam a thunun viau a, mahse set hnihna aṭangin a vannei tawk lo. Break point vawi 13 a hmuh zinga pathum chauh a chhawr ṭangkai theih a vangin world number 13 Bencic zawkin 2-6, 7-6 (7-2), 6-4 in hnehna a chang ta zawk.

German nula Kerber hian Australian Open-ah khan player langsar lo Danielle Collins a ngam lo a, tun season chhunga final a luhna awmchhun Indian Wells-ah pawh Canadian tleirawl Bianca Andreescu a ngam lo. Nomawi a kawl mekna Wimbledon atan pawh inbuatsaihna a kaltluang lo.

Kerber hnehtu kum 22 mi Bencic hian nizan khan final-ah Sofia Kenin a hmachhawn leh a, he thu buatsaih lai hian result kan hre hman lo. American player hian semifinal dangah Anastasija Sevastova chu 6-4, 4-6, 6-2 in a lo hneh ve thung a ni.