Joshua a ṭha tawk lo - Andy Ruiz Jr

Khawvel barakhaiha Anthony Joshua tukdawltu Andy Ruiz Jr. a ṭawng pawr a, "Joshua hi boxer ṭha a ni lo. Awlsam takin ka hneh leh ang," a ti!

Kum 29 mi Ruiz hian Joshua-a kawnghren kawl lai pathum - IBF, WBA leh WBO heavyweight title a chhuhsak vek a, kum tawp lamah Joshua nen hian inhnek leh tura ngaih a ni. Ruiz chuan, "Result ngai bak beisei suh u. A hma aiin ka inpuahchahna a ṭha zawk ang a, ka inring zawk ang. Joshua chak lohna ka hria a, a hma ai khan ka khel ṭha thei zawk tih ka inhria. 

"Joshua tih theih sang ber chu tlanchhiat a ni a, boxing thiam tak a ni lo," tiin British boxer a hmu 'nau' sawt hle. USA-a piang, Mexican mi Ruiz hian Joshua nen an inhnekna aṭang khan pound maktaduai 5.5 vel a hlawh chhuak nia sawi a ni a, "Ka nu car tur ka lei hmasa ber. Ka naupan laiin a car ka sawpchhe nasa em em a ni," a ti!

Boxer 'pathau' tia sawisel Ruiz hian Joshua nen an inhnek leh hunah chuan a danglam tur thu sawiin, "Inthlak danglamna in hmu ang. Ka weight pawh a zang tawh zawk ang a, fight hmuhnawm tak ka pho chhuak ang," a ti a, a phur hle.