Africa Cup of Nations 2019 Churchill midfielder Aucho hoin Uganda chak

Africa Cup of Nations 2019 khelh ṭan a ni ta a, Indian club Churchill Brothers midfielder Khalid Aucho khelhna Uganda chuan an match hmasa berah 2-0 in DR Congo an hneh nghal. 

AFCON-ah ram lian tia sawi theih inlan tawhte an la chak zel a, Egypt chuan match hmasa berah 1-0 in Zimbabwe an lo hneh tawh bawk - Uganda nen hian group khata awmho an ni. Champion tum ngam Nigeria chuan match hmasa berah 1-0 in Burundi an hneh ve bawk a, Guinea leh Madagascar chu goal hnih ve ve khungin an inhnehtawk bawk. 

Player mal khaia lak pawhin Uganda aiin DR Congo chu team ṭha zawk an ni a, khelmuala thil thleng erawhin thawnthu dang min hrilh thung. Kum 41 hnua AFCON-a an chak hmasak ber ni turin Uganda an chak a, striker pahnih     Patrick Kaddu leh  Emma­nuel Okwi ten goal khat ve ve an khung - Everton winger Yannick Bolasie hoa khel DR Congo-in a chhanletna tur an nei lo. 

Uganda-ah jersey number 8 ha chungin Aucho a tel a, DR Congo lakah minute 90 a khel chhuak ṭhak -  Churchill midfielder hi Indian club-a khel AFCON-a inlan awmchhun a ni a, 2017-18 season khan East Bengal tan a khel bawk. 

Super Eagles-in player langsar rual kawl chungin Burundi lakah goal khung an harsat - mahse minute 73-naah Odion Ighalo an luhtir a, Watford forward hlui hi Super Eagles chhandamtu a ni. 

Khelmualah minute li chiah hun a hmang hman tihin Ighalo hian goal a rawn khung nghal a, chakna goal a ni zui - an hneh team erawh world ranking-a 134-na chauh an ni a, champion an tum tak tak chuan inenfiah an mamawh. 

Guinea leh Madagascar 2-2 in an inhnehtawk a, Guinea tana Sory Kaba goal khung chu Madagascar-in Anicet Andrianantenaina leh Charles Carolus Andriamahitsinoro hmangin an chhanglet - mahse Guinea hian Francois Kamano penalty hmangin an khung leh a, an inhnehtawk.

Mohamed Salah telna an nih avangin Egypt-in ngaihven an hlawh a, inelna thlengtu an ni tel bawk - Zirtawpni zan khan an match hmasa berah Zimbabwe chu 1-0 in an hneh. Egypt tan Mahmoud Trezeguet chuan minute 41-naah nalh zetin he inkhela goal awmchhun hi a khung a, rin kai loh leh team ṭha lo zawk Zimbabwe lamin a chhanletna tur an nei lo. 

Liverpool forward Mo Salah-a'n second half-ah chance duhawm a nei a, mahse Zim­babwe keeper Edmore Sibanda chuan ṭha zetin a dan sak.