Dani Alves a chhuak dawn

Brazil captian Dani Alves chuan tun nipui bazar chhung hian season hnih chhung hun a hman tawhna Paris St-Germain a chhuahsan dawn a, season tharah khawi club nge a zawm dawn tih erawh a la sawi chiang lo.

Kum 36 mi Alves hian 2017 khan Juventus aṭangin PSG hi a zawm a, Paris club lian tan hian inelna hrang hrangah match 73 khelin goal riat khung sak hmanin Ligue 1 nomawi pahnih bakah French Cup leh League Cup pakhat ve ve a chawi pui hman a ni.

Barcelona defender hlui Alves chuan, "Tunah hian ka nuna bung pakhat chu ka khar a, chona thar dang tan kawng ka hawng leh ta. Hring nunah chuan thawnthu bul leh a tawp a awm ṭhin, Paris atan bik chuan hun tawp sawina hun a ni ta.

"PSG tana ka khelh lai khan tihsual leh tih fuh tawk loh ka nei nual ang tih ka ring, chungah chuan ngaidam ka dil. Hun hlimawm tak kan neih ho erawh hriatreng a nih tawh ka beisei," tiin a sawi. Brazil international hian Juventus tana Serie A nomawi a chawi hmain Barcelona lamah hlawhtlinna lian tham tam tak a lo chang tawh. Catalan club hi La Liga nomawi paruk a chawipui a, inelna ngaihhlut Cham­pions League-ah ngawt pawh vawi thum a champion pui a ni. Tunah chuan Copa America khelh laiah a thlengtu Brazil tan captain dinhmun a chelh mek a ni.