Siami awmna India an champion

Mizo nula Lalremsiami Hmar telna India hmeichhe hockey team chuan nimin khan Japan 3-1 a hnehin 2018-19 Women's FIH Series Finals champion an ni. India hi final an luh avangin 2019 FIH Olympic Qualifiers khel turin an tling tawh sa bawk a ni.

Nimin khan Japan khawpui pakhat Hiroshima-ah a chungnung ber nih inchuhin Asian ram ṭha pahnih an inhmachhawn. India tan captain Rani Rampal chuan minute thumna lekah goal hmahruai a khung a, a thlengtu lamin Kanon Mori hmangin sut mah se India hian Gurjit Kaur-i goal hnih hmanga vaw letin hnehna an chang.

India hi pool A-ah awmin, pool match-ah hian an khingpui Poland (5-0), Uruguay (4-1) leh Fiji (11-0) te an hneh vek a, semifinal-ah Chile (4-2) an hneh leh hnuah a thlengtu leh champion tura rinkai zawk Japan chu an hneh leh a ni. India-in match an khelh zawng zawngah Siami a inlan kim vek a, goal hnih a khung.

June 21, Zirtawpni zing khan Lalremsiami Hmar pa Lalthansanga chu Kolasib-ah heart attack vangin a thi, Siami hi Japan-ah India tan inelna pawimawh tak khela a fehchhuah lai a ni a, a pa ruang nang hman lo tura haw ai chuan huaisen taka ram tana inlan a thlang.

Semifinal an khelh hmain Siami chuan, "Ka pa ruang ka nang hman tawh dawn chuang lo a, chuvangin semifinal-ah Chile ka hmachhawn ang a, ka pa leh kan ram tan ka khel ang," tiin infiammi huaisen a nih ang ngeiin Mizo nula hian thutlukna huaisen tak a siam.

June 22, Inrinni chhun khan Chile lakah inkhel bul ṭan lo mah se khelmual chhungah luhtir a ni a, nidanga a khel ang a phak lo deuh nachungin player hmuhnawm zingah a tel phak tho, South American ram lakah dinhmun hniam zawka an awm hnuah 4-2 a hnehna changin final an in vaw kai.

Semifinal thlirkirin Siami chuan, "Zirtawp zan khan ka muhil thei lo a, tlaivar tuka inkhelh nghal chu taksa in ngai a awh lo. Taksa a chauh bakah rilru a chiai a, minute 10 vel chauh ka tlan khan ka chau deuh der. Mahse, ka pa leh kan ram tana khel ka nih avangin theihtawp ka chhuah chhunzawm zel a ni," tiin hun harsa kara Chile a hmachhawn chanchin Vanglaini a hrilh.

Vanglaini chuan October 2018 khan Lalremsiami hi an chenna in Kolasib-ah a lo zuk lenchilh tawh a, Youth Olympic Games-a silver medal a lak leh international level-a hlawhtlinna hrang hrang a chan tawh chungchangah biangbiakna a lo nei tawh.

Thenzawl Hockey Training Center aṭanga zir chhuak Siami hian "I awm dan tur chu Lalpa chungah nghat la; Amah chu ring la, Aman a ti vek ang." (Sam 37:5) tih hi a Bible chang innghahna a nih thu a sawi tawh a, tun ṭuma hlawhtlinna an chanah pawh he thu tho hi a nun innghahna ala ni zel.

Siami chuan, "Min hmangaihtu Mizo mipui ten min ṭawngṭaipuina vanga hetiang dinhmun thleng thei hi ka ni. Hun harsa ber ka tawn lai pawhin min hmangaihna lantira min thlahthlam loh avangin ka lawm," tiin Vanglaini a hrilh.

Kolasib tleirawl Siami hi India player beiseiawm berte zinga mi a ni mek zel a, coach Sjoerd Marijne pawhin captian Rani thlak zo tura a ngaih a ni. Junior team tana a khelh laiin senior-ah koh a ni a, a dam a nih phawt chuan India tan thlan zingah a tel ziah.