MTB Mizoram 2019 pakhatna Mesak-a

Mizoram Cycling Association (MiCA) chuan June 22, Inrinni khan a vawi khat nan Mizorama thirsakawr intlansiak 'MTB Mizoram 2019' a buatsaih a, Sihfa tlangval Mesak Vanlalvena chu pakhatna a ni.

Intlansiak hi Aizawl chhim daifema Zampuimanga hriatrengna lungphun, Silaimual aṭangin rider-te an tlan ṭan a, Hualngohmun khua an hêl a, Samtlang khuaah chhuak chhoin Lungleng lal in kawtah an tawp. Kilometre 20-a thui intlansiakah hian Mesak-a hi minute 57 leh second 46.59-ah a thleng a, pahnihna Vanlalruatpuia, Saikhamakawn chuan darkar khat leh second 14.63 hun a hmang a, pathumna Vanlalremsanga, Mission Vengthlang chuan darkar khat minute hnih leh second 0.98-ah a thleng ve thung.

MiCA hnuaia inelna hmasa berah hian mi 27 an tel a, an tlan chhuak vek. Kum 50 mi Malsawmkima (Maski-a), Mission Veng chu tel zinga upa ber a ni a, kum 14 mi Lalruatfela (Mafeltea), Bawngkawn chu tel zinga naupang ber a ni. 

Thirsakawr intlansiak hi tun ṭumah hian Mizoram chhunga chengte tan chauh a ni a, MiCA hian hun lo awm turah changtlung leh zau zawka tel theih tur intlansiak puitham zawk buatsaih an tum. Intlansiak a hlawhtlin nana 

ṭanpuina pawisa fai leh bungraw hrang hrang petu (sponsor) te chungah lawmthu an sawi a ni.