Benitez a chhuak dawn
Newcastle United manager Rafael Benitez chuan June 30-a a contract tawp hunah club a chhuahsan dawn.
Spanish manager hian Magpies hi season liam ta khan Premier League-ah 13-na a nihpui. Club thu chhuak chuan, "Rafa contract pawtsei tur hian hun rei tak chhung kan theihna zawng zawng kan chhuah a. Amaherawhchu amah leh a aiawh nen inremna kan nei thei lo," an ti.
Newcastle thuchhuakah hian Rafa coaching staff zinga mi Paco de Míguel Moreno, Antonio Gomez Perez leh Mikel Antia te an chhuah tur thu an ziak tel a, an hnahthawhah an lawm thu an ziak tel bawk. Europe club lian Real Madrid, Liverpool, Chelsea, Napoli leh Valencia manager hlui Rafael Benitez hian March 2016 khan Newcastle hi a zawm.
Benitez hian Newcastle a enkawl tirh hian chhanhim zo loin Championship-ah tlakpui mah se English club hi enkawl chhunzawmin 2016-17 khan EFL Championship nomawi a chawipui. Spanish manager hi Chinese Super League club Dalian Yifang chuan kum khata pound maktaduai 12 hlawh turin an lo sawm tawh a, a club hlui Chelsea nen sawi zawm an ni bawk.
Newcastle tan erawh Benitez thlakna zawn chu hna hmasa a ni dawn a, Abu Dhabi billionaire Sheikh Khaled bin Zayed al Nehayan chuan Magpies hi a lei ngei hmel avangin manager tura hming lamrik pawh a hraw nghal hle.
Benitez thlakna tur hian Jose Mourinho hming a ri ring ber a; Portuguese manager chauh ni loin Arsene Wenger, Max Allegri, Gennaro Gattuso leh Mikel Arteta hming pawh a ri tel.