Barty tan nomawi leh number 1

Ashleigh Barty chuan Nature Valley Classic-ah Julia Gorges hnehin nomawi a chawi a, Australian nula hi world ranking chhuak thar berah pakhatna a ni nghal bawk.

Pathianni zan Birmingham-a final khelhah Barty hian 6-3, 7-5 in hnehna a chang. French Open champion a nih hnua a tournament hmasa ber, grass court inelna lian Wimbledon inbuatsaihna ni nghal bawkah hlawhtlinna a chang tihna a ni.

Kum 23 mi Barty hian US Open leh Australian Open champion lai Naomi Osaka khumin ranking sang ber dinhmun a luah a, Evonne Goolagong (1976) hnuah Australian nula world number 1 ni thei hmasa ber a ni nghal bawk.

Barty chuan, "Sawi mai tur pawh ka hre lo zawk. Ka tan chuan kum danglam leh mak tak a ni, hringnunah hun harsa tawh chang awm mah se huaisen taka kan paltlang ngam a nih chuan chanchin lawmawm zawk a rawn thlen chang hi a awm ve leh ṭhin a ni," tiin a sawi.

Tennis player a nih hnuah Barty hian 2014 khan cricket a luhchilh daih a, an ram league-ah a inlan phak hial. Mahse, a hmangaih hmasa tennis huangah bawk 2016 khan kir lehin, season hnih a cham lehnaah a Grand Slam hmasa ber atan Roland Garros-ah hlawhtlinna a chang hial a ni.