VAR selna karah England leh France-in quarter final lut

Hmeichhe World Cup-ah video assistant referee (VAR)-in sawi a hlawh chhunzawm zel a, sawiselna karah England leh France ten an khingpui ve ve hnehin quarterfinal an lut. 

England hian Cameroon chu 3-0 in an hneh a, quarterfinal-ah Norway an hmachhawn dawn. Inelna thlengtu France-in anmahni ang thoa rinkai ni phak Brazil chu 2-1 in an hneh bawk - nizana USA leh Spain inkhela chak zawk an hmachhawn ang. 

Champion inbeisei England-in a vawi hnih nana World Cup khel ve chauh Cameroon 3-0 a an hneh hi thil mak a ni hran lo a, mahse VAR a inrawlh miau avangin a hnuah sawi zui a hlawh. 

England captain Steph Hough­ton-i goal hmahruai khungah sawisel tur a awm lo - mahse goal hnihna Ellen White-i khung erawh offside vanga pawm a nih loh hnuah VAR hmangin ennawn a ni a, an pawm zui. Cameroon hian second half-ah Ajara Nchout hmangin an si phurh an sutah an inngai a, amaherawhchu hei pawh VAR hmanga ennawn a nih hnuah offside vangin pawmsak an ni lo. 

Cameroon-in VAR rawn a nih avangin goal khat an chhuah a, an goal khung pawm a ni lo bawk. Referee thutlukna avang hian Cameroon player-te chu vawi hnih ngawt inkhel chhunzawm duh lo ang maiin an awm hman. 

Inkhelh zawhah Cameroon coach Alain Djeumfa insawifiah nghalin, "Beisei loh thil a thlen chuan chi ai a awlsam em em a, ka player-te kha inkhelh zui tum lo angin an awm lo," a ti a, referee thutlukna chu 'thudik hnualsuatna' tiin a sawi bawk. 

England boss Phil Neville chuan, "Cameroon player-te chet dan kha a zahpuiawm takzet a ni. Ka player-te ni se chuan England tan an khel leh tawh ngai lo ang," a ti!

France tana Valerie Gauvin goal khung hmasa zawk chu VAR rawn a nih hnuah pawm ni lo mah se kum 23 mi forward hian minute 52-naah goal hmahruai a khung zui. 

Brazil-in minute 63-naah Thaisa hmangin si phurh sutna goal an khung a, offside vangin pawm ni lo zet mah se VAR rawn a nih hnuah pawm a ni - goal dang lut loin hun a tawp. Extra time khelh a ni zui a, Amandine Henry chuan minute 106-naah France tan a rawn khung. Brazil-in theihtawp chhuah mah se si phurh sutna hun a awm tawh lo a, 2-1 in France an chak.