Hamilton dang thei an awm lo

Formula 1 world champion Lewis Hamilton chuan tun season chhungin amah elphaktu a tawng meuh lo. Mercedes driver hian Pathianni zan khan French Grand Prix-ah hnehna a chang a, championship hmahruaitu a nihna a nemnghet zual.

Circuit Paul Ricard-ah Hamilton hian a hmasa ber (pole position) aṭanga bul ṭanin harsatna lian tham a tawk lo a, kumin chhunga vawi ruk a chakna niin, car intlansiakna sang ber a hmachhawn tawh chinah ṭum 79 zet hnehna a chang tling ta.

Britain tlangval hnungah hian a teammate Valtteri Bottas a thleng a, Mercedes driver pahnih ten ro an relna hnungah Charles Leclerc (Ferrari), Max Verstappen (Red Bull) leh Sebastion Vettel (Ferrari) te an thleng ve thung a ni.

Formula 1 hian tun hnaiah beisei a phak hleithei ta meuh lo, mipui ngaihven leh ngaihhlut ni ṭhin mah se ram ṭhenkhat chuan inelna an thleng duh tawh lo a, intlansiak an neihna hmun tam takah tun hma angin fans an pungkhawm tam lo bawk.

World champion vawi nga ni tawh Hamilton chuan, "Inelna hi hmuhnawm taka chhuah kan duh a, chumi tur chuan driver-te hi a thuneitu kan ni lem lo. Intihsiaknaah khawl a tel tam lutuk chuan a hmuhnawm dan a nep thei, driver hian a tam thei ang ber mawhphurhna la thei ila, tun ai hian a hmuhnawm leh zual ang," tiin a sawi.