Qatar hnehin Argentina an tlang

Argentina chuan Pathianni zan khan Lautaro Martinez leh Sergio Aguero te goal hmanga Qatar 2-0 a hnehin Copa America quarterfinal an lut a, knockout stage an luh hnuah captain Lionel Messi chuan inelna tak tak a inṭan tak thu 

a sawi.

Group B inkhel dangah Colombia chuan Paraguay 1-0 a hnehin hmahruaitu an ni a, pahnihna ni lai Paraguay an chak loh avangin goal difference nei ṭha zawk Argentina chu group dang result ngaihchan ngai loin an tlang. Lionel Scaloni naute hian quarterfinal-ah Venezuela an hmachhawn ang.

Argentina hian match hmasa lamah Colombia 2-0 a an ngam loh bakah, Paraguay nen 1-1 a an inhnehtawk avangin group stage paltlang tur chuan Qatar an hneh ngei ngei a ngai - inelna hnuhnung pahniha finalist hi an dinhmun a him lo hman hle.

Porto Alegre-a inkhelah Sergio Aguero leh Lautaro Martinez te tlarhmaah an awm a, anni thlawp tur hian Messi chu zalenna pek a ni bawk. Inter Milan striker Martinez-a'n minute lina lekah Qatar defender ball pet chhuah fuh lo changin goal hmahruai a khung.

World champion vawi hnih ni tawh Argentina lamin ball chang hnemin inkhel thunun mah se goal hnihna khung tur erawh chuan an nghah rei a ngai. Bench aṭanga rawn lut Paulo Dybala hnen aṭanga a ball hmuh chu Aguero-a'n box chhungah a tlan luh pui a, Qatar defender pahnih a paltlang hnuin minute 82-naah chak nemngheh nan a khung a, goal dang a lut zui tawh lo.

Qatar lakah Lionel Messi-a'n goal a khung lo a, Barcelona captain hian hun ṭha nei nual mah se goal hmaah a vannei tawk lo. Manchester City striker Aguero chu an kingpui tlarhnung chhaih buaitu langsar a ni, a vanneih ṭum ni se goal khat aia tam a khung ang.

Argentina captain Messi chuan, "Ṭha taka khelin hnehna kan chang, inrintawkna nei tur chuan hetianga kan khelh hi a ngai a ni. Kan inkhelh ho tam chuan a nuam kan tiin kan in man zual zel. Tuna hnehna kan chan hian team chak leh khawng zawkah min siam ngei ang," a ti.

Inelna chungchang sawi zawmin Messi chuan, "A pawimawh lai chu Copa America aṭanga kan la tla lo hi a ni, tunah chuan inelna tak tak a inṭan chho dawn a ni," a ti. Argentina hian goal hnih chauh khung mah se goal khung theihna hun an insiam hnem a, an match hmasa lam aiin an khel ṭha hle.

June 24, Thawhṭanni kha Lionel Messi-a'n kum 32 a tlin champha a ni a, a pian chamah an ram hnehna a chanpui. Barcelona thiampuipa hi club lamah hlawhtling viau mah se ram tan nomawi lian tham a la chawi lo, a kum ngaihtuahin tun Copa America hi a tan hun ṭha hnuhnung pawh a ni thei tawh a ni.

Messi hian World Cup vawi khat leh Copa America final vawi hnih a khel tawh a, a chak lo lamah an ṭang vek. Kuminah pawh hian rinkai ber an ni phak lo, a thlengtu Brazil bakah inelna hmang ṭha Colombia leh Uruguay te chu rinkai zawk an ni.

Argentina manager Lionel Scaloni chuan, "Hmasawnna tur lai chu a la awm, second half-a ka naute khelh dan kha chuan min ti lungawi hle. Inelna hi Messi tan chauh a pawimawh a ni lo a, Argentina tana bei kan ni. Nomawi kan chawi theihna tur a nih chuan kan tih theih zawng zawng kan ti mai ang," a ti.

Group B-ah Colombia hian an khingpui Argentina leh Qatar an hneh hnuah anmahni hnaih bertu Paraguay chu minute 31-naa Gustavo Cuellar goal hmangin 1-0 in an hneh a, match thum khelhah hnehna an chang vek. Quarterfinal-ah chuan group danga pahnihna emaw pathumna an hmachhawn ang.

Nimin zing khan Colombia-in an group match hnuhnung berah David Ospina chu an chhawr thei lo. Arsenal goalkeeper, Italian club Napoli tana loan hmanga khel lai hi a pa Hernan Ospina damlo hmuh a ngaih avangin an ram lamah Colombian Football Federation (FCF) chuan haw an phalsak a ni.

Colombia coach Carlos Queiroz chuan, "Kan rilruah Ospina a awm reng, inelna pawimawh hmachhawn laia chhungkaw boruak ṭha lo lam neih a hrehawm turzia kan hiatthiampui. A awm loh karah Alvaro Montero-a'n ṭha taka a lo khelh theih avang erawh chuan a lawmawm hle," a ti.

Qatar    0 - 2    Argentina

ARG : Lautaro Martínez 4'; Sergio Aguero 82'

Colombia    1 - 0    Paraguay

COL : Gustavo Cuellar 31'