A vawi 10 nan Federer a champion

Roger Federer chuan grass court bikah chuan player dangte hneh tura a la ṭhat tawkzia lantir nan Halle Open-ah a vawi 10 nan a champion a, July 1 a khelh ṭan tur Wimbledon atan inbuatsaihna a nei ṭha hle.

Pathianni zana final khelhah Grand Slam vawi 20 champion tawh Federer hian David Goffin chu 7-6 (7-2), 6-1 in a hneh. Swiss star hian tennis a khelh hun chhungin nomawi 102 zet a la tling ta a, grass court inelna lian Wimbledon-ah a vawi kua nan champion a tum leh dawn a ni.

Kum 37 mi Federer chuan, "He hmuna ka inlan hmasak ber ṭum kha ka la hre reng, a vawi 10 nan nomawi ka chawi ang tih hi ka ngaihtuah phak ngai lo," a ti. Inelna malah chuan Halle Open hi a champion hnemna ber hmun a ni a, Dubai Open leh Wimbledon-ah te vawi riat ve ve hlawhtlinna a chang tawh bawk.

Tennis huanga 'Big Four' tia sawi ṭhin kum 37 mi Federer, Rafael Nadal (kum 33), Novak Djokovic (32) leh Andy Murray (32) ten kum 30 an chuang vek tawh a, kum 10 chuang infiamna an awpbeh tawh hi ṭhangthar zawk ten an chhuhsak chho dawn mek nia sawi a awm ṭan.

Federer chuan, "Kei, Rafa leh Novak te kan awm chhung chuan player chhuak thar tan tennis rawn thunun chu a awlsam bik lo ang. Kan dinhmun min luahlan thei an awm a nih chuan infiamna khawvel tan thil ṭha tak a ni thung ang," tiin a kum tam deuh tawh mah se player naupang leh tha za zawk a la hlau lo hle.

Tennis player piang tawh zinga ropui bera ngaih Federer hian tun hnai season thum chhunga a vawi khat nan French Open kha a khel a, final thleng zo lo mah se a khel chhe lo. A dam a nih phawt chuan grass court season an hman laiah hian player tawhkhirh berte zinga mi a ni leh ngei ang.