Copa America quarterfinal khel tur a hriat kim

South America ram hrang hrang football hmanga inelna sang Copa America 2019 quarterfinal khel tur a hriat kim a, nimin zing khan champion lai Chile leh Uruguay te hnung zuiin Peru leh Paraguay an tlang ve bawk.

Edinson Cavani goal hmanga Uruguay-in Chile 1-0 a an hneh avangin group C hmahruaitu an ni a, knockout stage-ah team nem zawka ngaih Peru an hmachhawn theih phah ang. Chile erawhin group B hmahruaitu Colombia an bitum a ngai dawn a ni.

Goal khat 

Maracana Stadium, Rio de Janeiro-ah tlang chiang tawh Chile leh Uruguay an inhmachhawn a, hnehna changtu zawk hi group hmahruaitu an nih dawn avangin a pawimawhna a nep chuang lo.

Ram pahnih an fimkhur tawn hle, goal khung loin an inhnehtawk mai dawn niin a lang hman. Hun tawp nan minute riat chauh a awm tawh tihin Paris Saint-Germain striker Cavani chuan hla deuh tak aṭangin a tauh lut a, an ram hnehna chanpui nan a tawk.

Uruguay manager Oscar Tabarez chuan, "Cavani hi chu dan theih a ni lo, goal khung tura theihna sang bik nei a ni. Ball a tauhna kha goal aṭangin a la hla hle a, khatiang kha chu player nazawngin an tih ve theih loh thil a ni," tiin a sawi.

Tabarez chuan sawi zawmin, "Inkhel hautak tak a ni a, khatiang inkhel kha chu thil danglam eng emaw zeuh hian result a thlak ṭhin. Ka naute hian football hmuhnawm an khel zel a, vawiin a lang chiang tak pakhat chu a tawp thlengin huaisen takin kan bei ṭhin tih hi a ni," tiin a sawi.

South America ram 10 bakah Asian champion Qatar leh Japan ten sawm an ni a, group match hnuhnung ber an khelh thlengin Japan-in beiseina an nei. Mahse, chak ngei ngei ngaihna inkhelah Samurai Blue hian Ecuador 1-1 a an inhnehtawk pui avangin an puanthuah an tel.

Hajime Moriyasu-a enkawl Japan hian an match hmasa berah Chile 4-0 in an ngam lo. Mahse, Uruguay 2-2 in an inhnehtawkpui a, match hnuhnung bera Ecuador an hmachhawn ṭum pawh hian Shoya Nakajima (15') goal hmanga hma hruaiin an dinhmun a ṭha hman hle.

Mahse, Uruguay laka goal hnih an hum theih loh avang bawkin an tlarhnung a pawp nawn. Chawlhlawk hma deuhin winger Angel Mena-a'n an siphurh a sut a, ram pahnih zingah goal khung thei awm se chuan quarterfinal an lut ang. Amaherawhchu, goal a luh tawh loh avangin an pahnihin an tla.

Group tina a ti ṭha pahnih zelin quarterfinal an lut nghal a, group pathum zinga a ti ṭha pahnih an tlang bawk. Japan hian point hnih hmuin Paraguay nen an inzat a, mahse goal difference an neih chhiat zawk avangin a hnuai hnung zawk an ni - Chile laka goal li an chhuah kha an ui khawp ang.

Inelna thlengtu Brazil, Venezuela, Peru, Colombia, Argentina, Paraguay, Uruguay leh Chile te quarterfinal-ah kan hmu dawn a, inelna hi Zirtawpni zing aṭanga neih ṭan leh tur a ni dawn. July 8-ah a hmawr bawkna neih tur a ni.