Mittui nen Torres a liam ta

'Atletico Madrid fapa rangkachak' tiin an sawi ṭhin a, a vanglai hun ropui ber erawh Liverpool-ah a hmang a, nomawi hmanga a lawmna thlentu erawh Chelsea an ni.

Kum 18 zet professional footballer a nih hnuah Fernando Torres chuan mittui nen inkhelh a chawlhsan thu a puang a, Spanish striker hmuhnawm ṭhin hi khelmual chhungah kan hmu tawh ngai dawn lo. Torres chuan, "Ka ṭhat dan bera ka khelh theih loh hun a hla tawh lo. Khelmualah hian nuamti taka khelh reng ka duh a, nuam tih loh vanga ka chawlhsan hun a thlen hmaa chawlh puan mai hi ka duh a ni," a ti.  

Kum 35 mi a ni tawh a, J League lamah Sagan Tosu tan a khel mek. Torres-a'n football level sang tak a tlin tawh lo tih a chiang a, football a chawlhsan hun tur hisap ngai lo khan a boot a khai ta. 

Madrid-ah club langsar bik pahnih an awm a, chu chu Real Madrid leh Atletico Madrid a ni. Real chu Madrid khawpuia mi neinung leh hausa te ṭan tur bikah an ngai ṭhin a, Atletico erawh mipui vantlang ṭan turah an ngai ṭhin. 

"Ka pa chu nitin eichawp dap a ni a, ka unaupa leh farnu te chu school kal turin darkar tam motor-ah an chuan a ngai ṭhin. Atletico hi chu keini ang chhungkaw tana din a ni a, keimahni ang awmkhawm an ni," tiin Torres pawhin a lo sawi tawh. 

'Anmahni ang' awmkhawmna club-ah Torres a inzir a, 'fapa rangkachak' tiin duat takin an kuangkuah ṭhin. Kum 19 mi lek a nih laiin captain armband an hren tir tawh. Mahse, Torres a vanduai. Atletico tan striker ropui ni tura a inbuatsaih laiin club lamin a beisei ang result an pe thei lo. 2006-07 season-ah season nga chhunga league-a an point hmuh san ber (60) hmu mah se UEFA Cup khelh nan takngial pawh a tling tawk lo. 

Torres rilru hnual lai takin Liverpool an lo lang a, Spanish striker hi English football-a inlan turin an lalut - a season hmasa berah match 46 khelh sakin goal 33 a khung nghal a, Premier League PFA Team of the Year-ah a lang nghal. 

Liverpool captain ropui Steven Gerrard nena an inkawp chu tun hnu thlenga sawi hlawh a la ni a, a mimal ang chuan an ṭhat dun lai ber an tawng ang hiala sawi theih a ni. Torres pawhin Stevie G nena an inkawp nawmzia hi a hai lo. Atletico Madrid, Chelsea leh Spain-ah te player ropui tak tak a khelhpui chungin English midfielder chu a player khelhpui tawha ṭha leh thiam ber a nih thu a sawi. 

Spanish striker chuan, "Ka khelhpui tawha thiam ber chu Steven Gerrard hi a ni tiin ka sawi fo tawh ṭhin. Stevie nen khelmual khata kan awm chuan ka game hi min thlak danglam sak ṭhin a ni ber a, minute khat chauh pawh ani nena khelhdun leh kha ka duhthusam a ni ṭhin," a ti. 

Liverpool tan match 142 inlana goal 81 a khung hnuah Torres-a'n Reds fan-te thinlung a tih natsak a, Anfield hnuchhawnin Chelsea lam a pan san - hetihlaia a man zat chu pound maktaduai 50 a ni. 

Torres chuan, "Chelsea sawmna ka pawm tur thu ka hrilh khan Stevie chu a keh chhe vek a ni ber a, Liverpool ka chhuahsan tur thu Gerrard hnena sawi kha ka career-a hun harsa ber pawl a ni. Khel dun tura duan ang mai kan ni a, ani ang hi ka tawng leh tawh lo ang," tiin Liverpool a chhuahsan khan a lo sawi tawh.

Liverpool fans tam zawkin a hunlaiin Torres dem mah se Reds tana a goal khung zozai avang khan tam tak chuan an ngaidam leh tawh a, a chhuah chhan a sawi phei chuan an ngaidam lehzual. Torres chuan, "Liverpool-ah khan title tih chauh lo chu ka nei kim vek a ni. Mahse, Javier Mascherano leh Xabi Alonso an hralh hnuah pawh a thlakna tur kan la lo a, kum 27 ka nih tawh bawk si avangin nomawi chawi ka duh a ni," a ti. 

Chelsea-ah Torres a lut a, a nomawi duh ber nia a sawi ṭhin Champions League nomawi a chawi a, Europa League leh FA Cup-ah a champion bawk. Mahse, Torres hringnun erawh a kim lo. 

Liverpool-a a nih ang kha Chelsea-ah a ni leh tawh lo a, season li hun a hman chhungin season khata goal 20 khung tlin ṭum khat 2012-13 (22 goals) chiah a nei. Mahse, 2011-12 season Champions League-a Chelsea champion avang erawhin Torres hi Stamford Bridge-ah pawh theihnghilh a ni tawh lo ang - semifinal-a minute 90-naa Bracelona laka a goal khung kha final hruai thlengtu a ni tlat!

Chelsea tan 2013-14 season thleng a khel a, match 172 a khelh sakah goal 45 a khung a, AC Milan leh Atletico Madrid-ah a hun tawp lam chu loan-in a hmang a, 2016 khan Atletico hian a nghetin an la kir. 

Torres-a'n Liverpool pana Atletico a chhuahsan khan amah chher liantu Atletico fans tam tak chuan an hrethiam lo a, an rilru a na a ni. Mahse, January 2015-a loan-a Atletico a pan leh meuh chuan ngaihdam a ni chiang hle. 

Striker manto pawh ni tawh lo, a vanglai hun hmang liam mek hmu turin Vicente Calderon-ah mipui 40,000 zet an pungkhawm tehreng a nih kha! "Atletico ka chhuahsan khan 'Mangṭha' tiin kan inthlah lo a, 'Inhmu leh ang aw' kan ti zawk a ni," a tih zawm zat a - thawm chu ring tak a ni. 

Ngaihdamna leh hmangaihna nen Torres chu kuangkuah a ni a, match 160-a goal 38 khungin hmangaihna chu a chhanglet. Kum 2018-ah chhuahsan lehin Japan a pan a, Sagan Tosu-ah a hun tawp a hmang ta. 

El Nino, tun hi in mangṭhana ni suh se, inhmu leh ngei zawk ang aw. 

Atlético Madrid 

Segunda División (2001-02)

Europa League (2017-18)

Chelsea

FA Cup (2011–12)

Champions League (2011–12) Europa League (2012 -13)

Spain

Euro (2008, 2012); World Cup (2010)