Eastbourne-ah Wozniacki a chak

Wimbledon inbuat­saihna tournament hnu­hnung Nature Valley International-ah cham­pion lai Caroline Woz­niacki chuan Thawhṭanni zan khan harsatna lutuk nei loin hnehna a chang a, world number 1 thar Ashleigh Barty erawh hliam tenau avangin a inhnukdawk thung.

Eastbourne-a inelna neihah world number 14 Wozniacki hian Belgium nula Kirsten Flipkens chu 6-3, 6-4 in a hneh a, a match lehpekah chuan German player Andrea Petkovic a hmachhawn dawn. Grass court inelnaah hian Barty pawh inlan tur zingah a tel a, mahse Birmingham lama nomawi a chawi hnu lawka inelna hmachhawn zui leh nghal chu a zuam rih ta lo a ni.

Australian nula Barty chuan, "Kum 16 mi chauh ka nih lai aṭangin ka banah hian hliam ka nei a, dam ṭhin mah se rawn lan leh chang a nei fo. Tunah chuan French Open bakah Birmingham lamah ka inkhel zo hlim a ni a, July 1 aṭanga khelh ṭan tur Wimbledon atan hahchawlhna hun a ni rih," tiin a sawi.

Grass court inelna lian leh ngaihhlut ber Wimbledon khelh hmain hun a tam tawh lo, tun hnaia player chhuak thar hmuhnawm zinga mi Bianca Andreescu pawh a dar (shoulder) hliam a la dam loh avangin All England Club-ah a inlan thei dawn lo.