2018-19 NBA Awards Most Valuable Player Giannis Antetokounmpo

Nimin khan NBA Awards semna chu Santa Monica, California-ah neih a ni a, Milwaukee Bucks star Giannis Antetokounmpo chuan James Harden leh Paul George te khumin Most Valuable Player atan thlan a ni.

Kumin NBA Awards hi Bucks tan hun duhawm a ni a, basketball legend Kareem Abdul-Jabbar nen chauh he club aṭang hian chawimawina hlu tak hi an la dawng. Bucks coach Mike Budenholzer leh general manager Jon Horst te chu Coach of the Year leh Executive of the Year-ah an thlang bawk.

Kum 24 mi Giannis hi amah hnaih bertu James Harden nen chiah first place vote an hmu a, Bucks star hian vote 78 a hmuh laiin Harden-in vote 23 chauh a hmu pha a, an inthlauhna hi vote 55 zet a tling.

Greek basketball player hi MVP dawng thei zingah a naupang pathumna a ni a, Derrick Rose leh LeBron James te a tluk lo. Kum 2013 NBA Draft-ah Giannis hi Bucks-in overall pick 15-naah an thlang chauh a, MVP ni thei zingah Steve Nash nen draft-a thlan har ber an la ni.

Houston Rockets erawhin twitter-ah lawmpui thu ziak mah se thutlukna chu an ṭawmpui loh thu an thai lang a, an star player Harden chu MVP nih phu ber a nih thu an ziak. Greek Freak tih hming lem an pek Giannis hi 2017 aṭang khan NBA All Star-ah a la lang ziah a, tun season khan Bucks chu Eastern Conference regular season-ah pakhatna a nih pui a, amaherawhchu conference finals-ah champion zui ta Toronto Raptors an pha lo.

Utah Jazz player Rudy Gobert chuan 2017-18 season khan Defensive Player of the Year chawimawina a dawng a, tun ṭuma a dawn leh takah chuan Kawhi Leonard (2014-15 & 2015-16) hnua kum zawnna dawng leh thei hmasa ber a ni. Rudy hian Giannis Antetokounmpo, Milwaukee Bucks leh Paul George, Oklahoma City Thunder te aiin vote a hmu ṭha zawk.

Rudy hian Dwight Howard record nihrual turin vawi khat dang nih leh a la mamawh a, Howard hian Orlando Magic tana a khelh laiin 2008 - 2011 khan season thum chhung a zawnin a lo dawng tawh a ni.

Bucks coach Mike Budenholzer chu NBA history-ah season khata vawi 60 tal mahni team chakpui thei pasarihna a ni a, coach ropui dang Pat Riley (vawi thum), Phil Jackson, K.C. Jones, Mike D'Antoni, Don Nelson leh Rick Adelman te huangah a tel chiah.

Tun ṭumah hian Budenholzer hi Michael Malone, Denver Nuggets leh Doc Rivers, LA Clippers te aiin vote a hmu sang zawk.

Los Angeles Clippers player Lou Williams chuan season thum nan Sixth Man of the Year a dawng a, Jamal Crawford record a tluk chiah. Williams hi LA Clippers tana a khelhpui Montrezl Harrell leh Domantas Sabonis, Indiana Pacers te aia thlan zawk a ni.

A hmasa berah chuan tun dinhmun thleng tura malsawmna min petu Pathian hnenah lawmthu ka sawi. Ka pa chungah lawmthu ka sawi. Tun hunah hian ka pain min telpui thei lo...  Kum hnih liam ta khan league-a player ṭha ber ni turin keimah leh keimah ka incho phur a. Court chhunga ka awm tawh chuan ka pa ka ngaihtuah a, nasa takin min fuih phur. Ka chauh chang te, ka taksa nat chang te leh inkhelh reng ka châk loh ṭum tein phurna min pe ṭhin. Tun huna min telpuitu ka chhungte ka hmangaih che u, in telve dawn lo a nih chuan eng hlawhltinna mah chan ka duh lo. Nangmahni vang chauha tun hun thleng hi ka ni a, ka mi entawn te chu in ni. A bik takin nu ṭha chungchuang ka nu, ka tan chuan hero i ni. Naupan lai chuan kan hmalam hun kan thlir thiam lo a, nu leh pa ṭha chuan kan hmalam hun min hmuh thiamtir a, kan chungah rinna an nghat a, mamawh hunah min kalsan ngai lo. Ka nu, kan chhungkaw innghahna i ni a, ka va chhuang tak che em! ka hero chu nang ngei hi i ni. - Giannis Antetokounmpo Giannis pa Charles chu kum 2017 September khan lungphu chawlin a thi a, lawmman semnaah hian a unaupa leh a nu Veronica Antetokounmpo ten an telpui a ni.