Milan-in Winter Olympics thleng dawn

International Olympic Committee (IOC) chuan 2026 Winter Olympics leh Paralympics thlenna tur hmun a puang chiang a, thlasik laia neih ṭhin infiamna khawmpui lian hi Italy ram khawpui pakhat Milan leh vur tawlhna hmun pakhat (ski resort) Cortina d'Ampezzo-ah neih a ni ang.

Skating sports leh ice hockey inelna te hi Milan-ah neih a ni dawm a, vur tawlh (skiing) chi hrang hrang chu Cortina lamah neih a ni thung dawn a ni. Winter Olympics hi Stockholm, Sweden pawhin thlen an dil ve a, vote lak a nih hnuah Italy ramin an chang ta zawk.

Kum 2026 Winter Olympics hi February 6-22 chhunga neih tur a ni dawn a, 2026 Winter Paralympics hi March 6-15 khian neih chhunzawm nghal tur a ni ang. Cortina hian Winter Olympics hi kum 1956 khan a lo thleng tawh, Turin pawhin 2006 khan a thleng tawh bawk a ni.

IOC president Thomas Bach chuan, "Milan-Cortina te ka lawmpui. Olympic Winter Games nuam leh hlimawm, tun hma lama ropui tak ni ṭhin ang kha kan neih leh ngei ka beisei. Italian mipui ten infiamna an ngainat zia kan hria, an khawpui ngaia an thleng nawn thei tur pawh hi an lawm ka ring hle," tiin a sawi.