Ronaldo hoin Juve an tla

Juventus an chak a, an inhnehtawk bawk a, mahse Cristiano Ronaldo hoin an tla bawk! Hei hi Champions League chu a ni. UCL nomawi duha tuihal Old Lady chu player 10 a khel Porto ngam loin last 16-ah an zinkawng a tawp.

Thawhlehni zan last 16 second leg inkhelah Juventus chuan an mikhual Porto 3-2 in an hneh a, inkhel hmasa nen belhkhawmin 4-4 chiah niin an goal neih zat a inang, amaherawhchu khualmuala goal khung hnem zawk Portuguese club hi an tlang.

Champions League nomawi lakpui thei tura an beisei Ronaldo an lak hnuah Juve an ropui thei rih lo. Real Madrid forward hlui ho hian team lian lo zawk Ajax (quarterfinal), Lyon (last 16) leh Porto (last 16) te an ngam lo.

Allianz Stadium-ah mikhual lamin minute 19-na lekah goal an khung, Merih Demiral-a'n box chhunga Mehdi Taremi a tih tluk vangin penalty a chawi a, midfielder Sergio Oliveira-a'n khungin inkhel hmasa nen belhkhawmin 3-1 in an sang fal.

Second half tir lamah Ronaldo siamsak hmangin Federico Chiesa-a'n phurrit zualpui a sut ṭhen a, minute 54-naah Porto striker Taremi chuan ṭul lo taka ball a pet luih vak vangin hnawhchhuah a ni - Italian champion tan kawng a siamsak.

Old Lady tan Chiesa bawkin Juan Cuadrado cross a tauh lut, team pahnih an intluk tawk chiah. Hun pangngaiah goal a luh belh loh avangin extra time khelh chhunzawm niin, Porto bawk a chefuh hmasa zawk an ni.

Goal hmahruai khungtu Oliveira-a'n hla deuh tak aṭangin freekick a pet lut a, hun tawp hma deuhin Adrien Rabiot-a'n tauh lut ve leh mah se si phurh sutna chauh a ni, a kum zawnin 'away goal rule' hmangin Juve an tla.

Team enkawl kawnga tawnhriat nei lo Andrea Pirlo an lalut a, player a nih laiin ropui viau mah se coach a nih hnuah erawh beisei a la phak lo. A zawna season kua an chawi tawh Serie A title hloh thei dinhmunah an ding mek a, an duh ber UCL aṭangin an tla bawk.

Pirlo chuan, "Inkhel pahnihah tihsual lian tak vawi li kan nei, a tam mah mah deuh a ni. UCL aṭangin tla mah ila kan beidawng tur a ni lo, tunah hian hmabak tam tak kan la nei. March chauh a la nih avangin league-ah pawh thil a la danglam thei," a ti.

Juventus tan team nem zawk Porto hneh loh hi zahna tur a ni, chutih rualin striker Alvaro Morata vanduai zan a ni ve bawk - Spain international hian hnai takah vawi hnih a hlah, a goal khung chhun pawh offside vanga pawm a ni lo.

Freekick aṭanga goal an chhuah danah dem tur an zawng a nih chuan keeper Wojciech Szczesny hming lam theih a ni, chutih rualin 'wall' a ding Ronaldo-a'n ball a hnungchhawn a, a ke zawnah holam taka a tlang tir avangin dem theih a ni bawk. 

Champions League last 16 an khelh dawn khan, khingpui tura an duh ber thlan theih ni se team tam tak chuan Porto hi an thlan mai a rinawm - player langsar leh huphurhawm tak an khawl loh avangin rin kai an ni lem lo.

Mahse, tunhma lama thawnthu an neih tawh ang kha a thleng nawn. Kum 2004 khan Manchester United nen an inhmachhawn a, hun tawp dawna Costinha freekick chhuih luh hmangin an tlang, khawvel barakhaihin UCL nomawi an chawi zui bawk.

Kum 17 a liam a, rinkai lo ni chungin Juventus an hneh, an hneh dan pawh United laka an chak ang thoin hun tawp dawn lama an freekick chhuih luh chu an chak chhan a ni, minute 66 chhung player kim loin an khel tih hriat tel a fuh bawk ang.

Porto coach Sergio Conceicao chuan, "He inkhel hi hriatreng a ni tawh ang, player-te khan hnehna chan tumin an theihna zawng zawng an hlan a ni. Porto player, Porto thisen kai leh club jersey hak phu tak hlir an ni," tiin a naute inpekna a dahsang hle.