Zarkawt BCA an champion dawn? Inkhel a la zo lo - Khatla TBL coach

Mizoram Super League champion hnem ber ni turin Zarkawt BCA dinhmun a ṭha tawh a, match khat an chak leh a nih chuan a vawi thum nan MSL title an la ang - zanin dar 7:30 hian Khatla TBL nen an inhmachhawn dawn. 

Game 1-ah chak lo mah se TBL an la beidawng bik lo. Coach Lalrinzuala (Rina) chuan 'comeback' ngei an tum thu a sawi a, "Inkhel a la zo lo," tiin Vanglaini a hrilh. BCA tan awlsam taka nomawi chawi ngawt theih a ni dawn lo.

Vawiin tlai hian MSL7 khel tur zawnna playoff game 2 khelh a ni dawn. Game 1-ah Chawnpui chuan Bethlehem lakah 90-70 in hnehna an chang, an inthlauhna hi point 20 zet a ni. An chesual viau a nih loh chuan Bethlehem hi tlang tura rinkai zawk an ni.

Thawhlehni zan khan Hawla Indoor Stadium, Republic Vengthlangah MSL6 Finals game 1 khelh a ni, champion lai Zarkawt BCA chuan Khatla TBL lakah 89-80 in hnehna an chang a, champion turin an dinhmun a ṭha tawh.

Zarkawt team tan hian Lalrina Renthlei-in point 27 zet a nei a, ani bakah hian Matthew Remtluanga Sailo (23 points) leh Zonunsanga (21) te an langsar. Tualchhung player an nei ṭha tawk tih a takin a lang, zaninah pawh an innghahna an ni leh ang.

BCA dinhmun a ṭha a, tlang tura rinkai pawh an ni. Mahse quarter pali zinga pathumah a hniam zawk an ni, an inthlahdah zeuh a nih chuan chak lo thei an ni tih a chiang - chak chiangsa tih rilru pua game 2 khelh ngawt chi chu a la ni dawn lo.

MSL season hmasa pahniha champion thei TBL lamin tun hma lama an boruak an phak lo, mahse an player zingah tawnhriat nei ṭha leh theihna nei sang an tam avangin dah hniam theih ngawt an ni bik lo - BCA laka zam tur an ni lo.

TBL coach Rina chuan, "Quarter hnihna bakah quarter thumna tir lamah kan defending a chhia a, game 2-ah chuan siamṭhat kan tum ang. Champion hi game khat chauha zawn a nih loh avangin beiseina kan la nei," tiin Vanglaini a hrilh.

Khatla club hian point 23 nei thei Vanlalrinchhana an nei a, Eddie Zaithanmawia (21 points) bakah point 20 neitu Rakesh Singh an nei bawk. Haryana forward Rakesh chungah mawhphurhna a sang zual dawn, point a nei hnem tawk lo a nih pawhin rebound lak leh basket venhim lamah a thawhhlawk zual a ngai ang.