Dortmund tan Haaland a ropui

Borussia Dortmund-in goal khung thei bik striker Erling Braut Haaland an kawl a, Sevilla hnehin Champions League quarterfinal an lut. Haaland hian German club tan goal hnih a khung a, Spanish club nen second leg-ah 2-2 in an inhnehtawk. Dortmund hi First leg-ah 3-2 a an chak tawh avangin aggregate-ah 5-4 in an chak a, Haaland hian Sevilla lamah hian goal li ngawt a khung.

Signal Iduna Park-ah Haaland-a'n minute 35-naah Marco Reus a siamsak chu goal-ah a chantir a, first half-ah Dortmund-in 1-0 in hma an hruai. Second half-ah Haaland bawk hian angle zim tak aṭangin a khung a, refereee-in foul a ham. 

Amaherawhchu VAR hmanga en let a nih hnuah Haaland lakah hian Jules Kounde a foul avangin referee-in penalty a pe zawk a, Norwegian striker penalty hi keeper Yassine Bounou-a'n a dang. Dortmund an vannei a, keeper Bono hian goalline a pelh avangin Haaland-a'n a pet ṭha leh a, minute 54-naah goal hnihna a khung.

First leg-ah 3-2 a an chak tawh bawk avangin Dortmund hi 5-2 in hma an hruai a, an dinhmun a ṭha. Amaherawhchu Youssef En-Nesyri-a'n penalty aṭangin minute 68-naah Sevilla tan siphurh a sut ṭhen a, Moroccan striker hian injury time-ah a tauh lut leh bawk a, second leg-ah 2-2 in an inhnehtawk a, aggregate-ah Dortmund 5-4 in an chak.

Messi, Ronaldo leh Lewy tluk loh Champions League goal thuntu ropuite chu Cristiano Ronaldo, Lionel Messi leh Robert Lewandowski te an ni a, amaherawhchu kum 20 mi an nih lai kan thlir kir a nih cuan player ropuite hian Haaland hi an tluk lo hle.

Ronaldo-a'n Champions League-a goal 20 khung turin match 56 a mamawh a, Messi-a'n match 40 mamawhin Lewandowski-a'n match 36 a mamawh. Norwegian striker Haaland erawhin goal 20 khung tling turin match 14 chiah a mamawh a, kum 20 leh ni 231mi chauh a nih bawk avnangin hmabak a nei êng hle.