Vawiinah NorthEast Derby

Vawiin tlai dar 2:00 hian Kishore Bharati Krirangan, Kolkata-ah Aizawl FC leh Neroca FC te an an inhmachhawn dawn. I League aṭanga tla tur zawnna a nih tawh avangin NorthEast Derby ni mah se inkhel hlutna a tlahniam tawh.

Manipur club Neroca hi tla thei dinhmuna an ding chungin an match hnuhnung berah table mawngphaha awm Indian Arrows lakah 3-0 ngawtin an tlawm. Tun season I League aṭangin AIFF enkawl rawlthar ṭha rual awmna Indian Arrows leh in lei tling Sudeva te an tlak theih loh avangin tun dinhmuna tla tur chu Neroca an ni.

Chutihrualin Mizo club Aizawl FC erawh I League khel zel turin an dinhmun a ṭha tawh hle. Yan Law hote hian Neroca hi an hneh a nih chuan an him tawh dawn a, point 18 an hmuh tawh dawn avangin Manipur club-in an umpha thei tawh lo ang. Aizawl FC hian January 30 khan Neroca hi 2-1 in an lo hneh tawh bawk.