Khalid leh Apuia zinkawng a tawp ta

Indian Super League semifinal-ah NorthEast United chuan 2-1 in ATK Mohun Bagan an ngam lo a, ISL final khelh an beiseina chu tihtawp a ni ta. 

Highlander leh Bagan hi semifinal first leg-ah 1-1 in an inhnehtawk a, second leg inkhel hmuhnawm takah  2-1 in Guwahati club an tlawm - inkhel pahnih belhkhawma an chak lohna chu 3-2 a ni. 

Bagan hian David Williams leh Manvir Singh hmangin 2-0 in hma an hruai hman a, VP Suhair chuan Highlander tan chhanglet ve mah se Luis Machado chuan penalty a khung loh avangin 2-1 in an tlawm. 

Tun season ISL-a match 11 a team a kaihhruainaah Khalid Jamil a tlawm ve ta a, pen khat chiahin ISL final a rap ta lo. March 13-ah ISL final khelh a ni dawn a, Mumbai City leh Mohun Bagan-ten champion an inchuh ang. 

Inkhel ṭantir aṭangin Bagan-in na takin an nawr nghal a, Javier Hernandez chuan post a pet per bakah Subhasish Bose leh Roy Krishna-te chuan Highlander keeper Subhasish Roy enchhinna an rawn nei nghal. 

Highlander-in chance nei lo an ni bik lo a, Idrissa Sylla leh Machado-ten an hun ṭha neih erawh an chhawr thei lo. Minute 38-naah Williams-a'n a khung ta nge nge a, Highlander defender-ten an tih tur an ti tawk lo. 

Mizo tlangval Lalengmawia'n si phurh sutna remchang nei ve zui mah se a hun ṭha neih a chhawr lo a, minute 45 chhunga team hlauhawm zawk chu Bagan an ni. 

Second half-ah Highlander an zia sawt a, an goal nawr pawh a na hle - mahse, minute 68-naah Manvir Singh a inlar a, Indian striker hian Highlander tlarhnung pherh zarah Bagan goal hnihna a khung. 

Team indinnghet se, a leta budget sang zawk, an player duh zawng hlah lo Bagan-in 2-0 in hma an hruai a, team tam tak chu ni se an beidawng tawh ang. 

Mahse, Khalid-a team an ni miau a, Highlander an beidawng lo. Minute 74-naah che fuh hleithei lo Suhair-a vanneih hun a thleng a, si phurh sutna goal a khung.

Highlander-in an la duhtawk lo cheu - Sylla laka foul avangin Subhasish Bose chuan penalty a chawi a, a pet turin Machado a lo pen chhuak. 

Mahse, Portuguese forward hian goal chung lamah a thlawh a, hun ṭha neih bawhpelhtu Highlander an tho leh tawh lo - 2-1 in inkhel a tawp a, huaisen taka beitu NorthEast United-in ISL an mangṭha. 

NorthEast coach Khalid-a'n NorthEast United-a enkawl khan league table-ah pasarihna an ni a, league round an khelh zawh meuh chuan table-ah pathumna niin semifinal an lut - semifinal-ah tlawm mah se Khalid hi inchhuang tur a ni. 

Tun season ISL match 11 a team a kaihhruaia vawi khat chiah tlawm Khalid chuan, "Indian coach-te hi inrintawkna kan pe tur a ni. Foreign coach hi an ṭha ngei a, mahse, Indian coach pawhin an ti ve thei a ni. Coach ṭha kan nei ṭeuh a, an mamawh chu chance pek a ni," a ti. 

Bagan coach Antonio Habas chuan, "NorthEast hian season duhawm tak an hmang a, team hmachhawn hautak tak an ni. Goal nawr tur, a lai veng tur leh tlarhnung thlengin player an nei ṭha em em. 

"Mahse, kan ṭha zawk a, hnehna chan kha kan phu a ni," a ti - Habas hian season hmasaa 'ATK' an nih lai leh 2014 khan ISL nomawi hi a lo chawi tawh a, a vawi thum nan champion leh a tum dawn. 

NorthEast United tan season tluanin Apuia chu player pawimawh a ni a, Mizo midfielder chuan an beisei aia san an thlen thu a sawi. 

Apuia chuan, "Club budget kan ngaihtuah chuan kan thlen chinah hian kan lawm viau. Kan squad-ah ISL semifinal khel tawh kan la awm mang lo a, anni erawh semifinal khel tawh an ni fur thung. A tawpah tawnhriat nei ṭha zawk an dingchang ta niin ka hria," tiin Vanglaini a hrilh.

Vaivakawn tlangval hian tun season-a match 22-a khelhah goal khat a khung a, hero of the match-ah vawi li thlan a ni a, February khan hero of the month-ah thlan a ni - tun season ISL-a Indian player zinga he dinhmun luah thei awmchhun a ni. 

Apuia chuan, "Ka season hman danah ka lawm a, goal leh assist erawh hei aia tam neih ka duh," a ti a, ISL club-ten an rim rawn chungchangah, "Tunah chuan ka hma hun ka la sawi thei lo," tiin Vanglaini a hrilh.