Liverpool fan-ten min duh lo - Gerrard

Premier League champion Liverpool-in tun hnaiah an beisei ang result an nei thei lo a, Anfield-ah league match ruk zet chu a zawnin an tlawm tawh. 

January thlatir thlenga Premier League nomawi humhim beisei Liverpool hian tunah chuan league nomawi chawi aiin Champions League khelh phak leh phak loh an khel mek.

Hetiang boruak karah hian hmanni lawka khawih chet thiang lo ang maia ngaih Jurgen Klopp dinhmun a derthawng chho a, Liverpool legend Steven Gerrard-a'n Rangers a champion pui bawk si avangin coach inthlak chungchang a ri mek. 

Mahse, Gerrard chuan, "Liverpool fan-ten an manager ni turin min duh lo," tiin a sawi a, Anfield-ah 'Captain Fantastic' hi coach ang chuan kan hmu lawk rih dawn lo niin a lang. 

Gerrard-a'n Scottish Premiership nomawi Rangers tan a chawi a, kum 10 hnua Rangers-in  league nomawi an chawi lehna hmasa ber a ni.

England international hlui champion-na hi sawi nep theih a ni lo. Rangers-a enkawl tirh hian 'awm lo a ta' team din turin a lut a ni ber a, engmah loa awm tawh Rangers hi tuai hnumin champion team-ah a chhuah. 

Scottish Premiership-a a zawna season kua zet champion tawh Celtic lal ram a ṭhiat a, league match ruk khelh tur a la awmin an champion fel der - match 32 an khelh tawhah an la tlawm miah lo!

Hei mai hi a ni lo - Europa League-ah tlawm nei miah lo chungin last 16 an lut a, Gerrard-a hnathawh hi sawi nep theih a ni lo. Zanin dar 11:25-ah Slavia Prague mualah last 16 first leg an khel ang. 

Khawvelin Gerrard-a hnathawh a hmu a, Klopp tlusawp lai mek an hmuhhmaih chuang si lo - hei vang tak hian Klopp-a thlak turin Gerrard hming lam rik a ni ta a, media-te titi tui ber a ni nghal. 

Mahse, Gerrard chuan, "Liverpool fan-ten an manager ni turin min duh lo a, Jurgen Klopp hian he hna hi chelh chhunzawm zel se an duh - fan-te ngaihdan hi ka ṭawmpui em em a ni," a ti. 

Kum 2018-a Rangers a zawm hmaa Liverpool youth team-a coach hna chelhtu Gerrard chuan sawi chhunzawmin, "Klopp thlak chungchang hi kan sawi tur pawh a ni lo. Khawvela manager ṭha ber pawlin kan club-a enkawl mek a, ka hmangaih a ni. 

"Kei pawhin hna dang ka nei mek a, he thil chungchang sawi hi a ṭangkaina ka hre lo. Jurgen hi Liverpool-ah kum tam tak a cham chhunzawm ka beisei," a ti. 

Klopp-a enkawlna hnuaiah Liverpool-in kum 2019 khan Champions League nomawi an chawi a, a hma season-ah final an khel bawk - nikum khan kum 30 hnua a vawi khat nan English top flight league-ah an champion bawk. 

Hei mai hi a ni lo - nikum khan UEFA Super Cup leh FIFA Club World Cup-ah an champion bawk a, tun season-ah beisei phak lo mah se a hnathawh tawh zawng zawng thlirin Gerrard-a'n Klopp thlak ṭulna a hre lo hi thil tih awm tak a ni. 

Gerrard chuan, "Liverpool hi ka club-a ni a, he hmunah hian zin kawng ngaihnawm tak tak ka zawh a ni. Liverpool enkawl hi ka duhthusam chu a ni ngei a, mahse, tun atan chuan a la ni lo - Reds tan hian ka lo ṭha tawk lo mai thei bawk," a ti a, a inngaitlawm hle. 

Kum 40 mi Gerrard hian Liverpool tana a khelh lai khan match 710 zet khelin goal 186-a khung a, assist vawi 143-a nei bawk - Champions League (1), FA Cup (2), League Cup (3), UEFA Cup (1), UEFA Super Cup (1) leh Community Shield-ah te a champion. 

Thawhlehni zan khan Germany coach Joachim Low-a'n European Championships 2020 zawha a hna a bansan tur thu a sawi a, Low thlaktu tur an inrinsiak nghal. 

Liverpool lama result duhawm lo karah Klopp-a hming lam rik a ni a, mahse, Borussia Dortmund boss hlui hian Anfield chhuahsan tumna a nei lo. 

Klopp chuan, "Nipui hunah Germany enkawl turin ka awm ang em? tia min zawh chuan a chhanna chu, 'Aih,' tih hi a ni. Midangin Germany enkawl hna hi chu an thawk ang.

"German manager ṭha tam tak ka hmuh hian German FA hian Low thlak tur ṭha tak an hmu ang tih hi chu ka chiang a ni," a ti a, Gerrard-a duh angin Klopp-a cham dawn. 

Klopp-a'n 2024 thleng cham turin contract-a nei mek a, Anfield-a a contract neih lai chu a zah tur thu a sawi zui. German coach chuan, "Liverpool-ah kum thum cham turin contract ka la nei a ni lawm ni?

"Germany coach ni turin ka awm dawn lo. Contract kan ziak a nih chuan chu chu kan zah tur a ni a, Mainz leh Dortmund-ah pawh chu chu ka tih dan a ni," a ti a, a contract hman zawh a tum hle. 

Liverpool hian Premier League-ah pariatna dinhmun hauh mekin hmahruaitu Manchester City chu point 22 ngawtin an thlau mek a, 1953-54 season-a First division mawngphah an luah hnua a vawi khat nan Anfield-ah vawi ruk an tlawm tawh. 

Premier League club hian nizan dar 1:30 khan Champions League last 16 second leg-ah RB Leipzig an mikhual a, he thu buatsaih a nih lai hian result kan hre hman lo - first leg-ah 2-0 in an chak tawh. 

Gerrard leh Klopp-a chanchin karah nipui transfer-a a contract hmang zo tawh tur Georginio Wijnaldum hming a ri a, Dutch midfielder hian Anfield-ah tun thlengin contract thar a la ziak lo. 

Wijnaldum chuan, "Tun dinhmunah chuan eng chanchin thar mah a la awm lo a, ka sawi theih awmchhun chu he club-ah hian team, staff leh fan-te nen ka hlim em em a ni. Hlim loh avanga he club chhuahsan tur ka ni lo. 

"Mahse, thil engkim ngaihtuah a ngaih avangin hma hun hi awlsam taka chinfel chi a ni lo a, ka chhuak a nih chuan min hmangaih em em tu club ka chhuahsan dawn avangin hrehawm ka ti ngawt ang - thil thlen danah engkim a innghat," a ti. 

Kum 30 mi Wijnaldum hian July 2016 khan pound maktaduai 25-in Reds hi a zawm a, inelna hrang hrangah match 224 khelhsaka goal 22 khungin assist 16 a nei a, tun season bikah match 38 khelin goal thum a khung tawh.