Zaninah Man United Vs Milan

Europa League last 16 chu zanin aṭangin khelh ṭan a ni dawn a, zan dar 11:25-a inkhel tur Manchester United leh AC Milan chu inkhel ngaihven hlawh ber a ni ang. Man United hi Premier League-ah pahnihna an ni mek a, Milan hi Serie A-ah pahnihna an ni ve bawk.

Club pahnih hi league-a an dinhmun avang te, club sulhnu avang te leh an player neih dan aṭanga thlirin Champions League-a inkhel tlak an ni a, amaherawhchu an inhmachhawnna tur hi Europe-a inelna sang ber dawttu Europa League a ni thung.

Milan player-a thawm nei lian ber chu Zlatan Ibrahimovic a ni a, Swede striker hian Manchester United-ah hming a chher tawh. Zlatan hi kum 39 mi a ni tawh chungin Milan player pawimawh a la ni pha a, tun season inelna hrang hrangah goal 16 a khung tawh.

Amaherawhchu Ibra hi Roma nen March 1-a an inkhelh ṭumin a inhliam a, Udinese (1-1) leh Verona (2-0) nen an inkhelh ṭumin a inlan lo. Old Trafford-ah pawh  Ibra hi inlan lo turah ngaih a ni a, tunah erawh beiseina a awm.

Milan boss Stefano Pioli chuan, "Zlatan-a'n hma a sawn. Man United lakah chhawr theih kan beisei a, team ti phurtu a nih avangin a awm hi kan mamawh a ni," tiin a sawi. Swede striker hian Man United hi Europa League-ah a champion pui tawh a, season hmasa berah goal 28 khungin season hnihnaah inhliam vangin goal khat chiah a khung.

Milan leh Man United hi vawi 10 an inhmachhawn tawh a, vawi nga ve ve an chak. An inkhelh tawhnaa hriat zui hlawh ber chu 2007 Champions League semifinal kha niin Kaka vanglai a ni. Brazilian star hian Old Trafford-ah goal hnih a khung. Italian club hi khualmualah 3-2 in chak lo mah se an mualah 3-0 a an chak avangin final an lut ta zawk.

Tun ṭumah erawh Milan hian Kaka tlukpui tur an nei tawh lo a, an club top scorer ni mek pawh kum 39 mi Zlatan a ni a, first leg-ah a inlan a rinawm lo zawk. Swede striker a awm lo a nih chuan Portuguese striker Rafael Leao chu tlarhmaa rinrawl tur a ni ang.

Stefano Pioli tana harsatna belhchhah turin Theo Hernandez, Daniel Maldini, Hakan Calhanoglu, Ismael Bennacer, Ante Rebic leh Mario Mandzukic te dinhmun a chiang lo. Chutihrualin Man United aṭanga loan hmanga an hawh Diogo Dalot an chhawr thei dawn a, kum 21 mi Dalot hian Verona an hneh ṭumin goal a khung.

Manchester Derby-ah Marcus Rashford a inhliam a, Milan nen a inlan thei dawn em tih a chiang lo. Etihad Stadium-ah hian player langsar Paul Pogba, Donny van de Beek leh Edinson Cavani te an tel lo. Uruguayan striker hi a pa Luis Cavani-a'n England nuam a tih loh avangin season tharah chuan South America-a let a rinawm thu a sawi.

Milan nen hian tlarhmaa awm tur hriatthiam a harsa a, Man City nena khel ṭha Anthony Martial-a'n hmun pawimawh a chan a rinawm. Attacking player dang Daniel James leh Mason Greenwood te pawhin khelhna hmun an nei thei ang. English keeper Dean Henderson-a'n clean sheet vawi thum a nei tawh a, Man United no. 1 ni turin a chet ṭhat chhunzawm a ṭul dawn a ni.