Goal 100 khung thei Spurs

Tottenham Hotspur-in tun season-ah goal 100 an khung tling tawh. London club hian Harry Kane, Son Heung-min leh Gareth Bale te an kawl a, an record hi a mak hran lo.

Spurs hian zanin dar 1:30 hian an mualah Dinamo Zagreb an mikhual dawn a, nomawi chawi thei bik manager Jose Mourinho-a'n Europa League inelna hi a ngai pawimawh ang.

London club hian Premier League-ah goal 46 an khung a, FA Cup-ah goal 13 an khung a, League Cup-ah goal ruk khungin Europa League-ah goal 35 an khung. Inelna hrang hranga an goal khung dan thlir hian Spurs hian Croatian club lakah pawh goal an khung ngei a rinawm.

Spurs leh goal sawi zawm a nih tawh chuan Kane (24) leh Son (18) sawi hmaih a thiang lo a, player ṭha pahnih hian inelna hrang hrangah goal 42 an khung. Tun hnaiah Bale-a'n a thiamna a rawn pho chhuak leh bawk a, Real Madrid aṭanga loan hmanga an hawh Welsh forward hian tun season-ah goal 10 khung tawh.

Kum 31 mi Bale hian inelna hnuhnung paliah goal nga a khung a, Spurs player 'form' ber ang hiala chhal theih a ni. Spurs trio te hi an che ṭha a nih ngat chuan Zagreb tan London-ah hnehna chan a harsa ang.