An player hluiin Arsenal hneh tum

Zanin dar 1:30 hian Arsenal chu Europa League last 16 first leg khel turin Olympiacos mualah an lenglut dawn. Greek club-ah hian January bazar laia an chhuahtir tak Sokratis Papastathopoulos a awm.

Greek defender hian a club hlui nen an la inpawh ṭhat thu a sawi a, chutih rualin tunah chuan inel an nih tawh avangin North London club laka chak ngei an tum thu a sawi, khelmual chhungah chuan ṭhian ṭha a awm thei dawn lo.

Sokratis chuan, "Hmanni lawk kha chuan kan la awmkhawm reng, tun hnai maia inhmachhawn nghal chu a mak duh dawn hle. Ka ṭhian ṭha tak tak an la awm, a bik takin Luiz, Xhaka, Aubameyang, Lacazette, Bellerin leh Soares te nen kan la inbe reng.

"Ka hmelhriat leh ṭhiante ni mah se tun ṭumah chuan chak ka duh, inṭhian ṭhatna leh round sang zawk luh chu thil dang daih a ni. Tunah chuan Olympiacos hi quarterfinal luh pui ngei ka tum," tiin a sawi.

Kum 32 mi Sokratis hian Mikel Arteta kaihhruaina hnuaiah khan khelhna hmun a chang meuh lo, a contract neih lai pawh inhriatthiam tawnna a tihtawp a ni. Olympiacos-eh erawh vawi kua a inlan leh tawh, zaninah pawh player pawimawh a ni ang.