Kvitova khel tluan thei lo

Petra Kvitova chu a malpui hliam vangin Dubai Tennis Championship khelh lai aṭangin a inhnukdawk. Wimbledon vawi hnih champion tawh hi Jil Teichmann nen an inkhelh laiin a khel chhunzawm thei lo.

Seeded palina Kvitova hi first round-ah a bye a, nimin khan second round khelin Swiss nula lakah 6-2, 3-4 in a hniam zawk mek a, hliam nei zuiin a inhnukdawk a ni.

Kvitova chuan, "Kar hmasa lama inelna kan nei lai aṭang khan hliam tenau chu ka nei tawh. Tun tournament ka khar dan chu duhthu a sam lo hle, chutih rualin tun hnaia ka match khelh danah erawh ka lawm," tiin a sawi.

Kar hmasa khan Kvitova hian Qatar Open title a la, hlawhtlinna a chan ṭum hian Anastasia Pavlyuchenkova, Anett Kontaveit, Jessica Pegula leh Garbine Muguruza te a hneh thei, a dam chuan player ṭha dangte hneh turin theihna a nei sang.

Dubai Tennis Championship-ah hian champion lai Simona Halep chu a tir aṭangin a inlan lo a, world number 1 Ashleigh Barty pawh hliam vangin a inlan thei lo bawk.

March 23 aṭang hian Miami Open khelh leh a ni dawn, player langsar chu an inlan tura ngaih a ni.