Wimbledon sawiseltu Nadal

Rafael Nadal chuan July 1 aṭanga khelh ṭan tur Wimbledon a thlirlawk a, grass court inelna lian hi Grand Slam danga ang lo taka mahni chin ṭhan dan anga kal ṭhin awmchhun an nih thu a sawi.

Tennis tournament an khelh ṭan hmain inelna buatsaihtu lamin player seeding an siam ṭhin, major tournament dang pathum Australian, French leh US Open-ah te chuan world ranking milin an siam mai ṭhin. Wimbledon-ah erawh a ni ve kher lo, an inelna hmuna player cheṭha leh duhsak zawng an lantir fo.

Tun dinhmunah Nadal hi world number 2 a ni a, season dang ang bawkin Wimbledon-ah chuan amah aia ranking hniam zawk Roger Federer an dah sang leh zawk ngeiin a rinawm - nikum mai pawh khan player pahnih hi an indah karthlak tawh a ni.

Kum 33 mi Nadal chuan, "Seeded pathumna ai chuan pahnihna chu a ṭha ngei mai. Mahse, pathumnaah min dah a nih pawhin ka pawm mai tur a ni, a pawimawh zawk chu ṭha taka inelna ka hmachhawn a ni zawk ang.

"Wimbledon hian chin ṭhan dan a nei, tournament dang kalphung lo deuh pawha kal dan an nei a ni," tiin a sawi. Nadal hi seeded pathumna an pe a nih chuan, champion lai leh world number 1 ni bawk Novak Djokovic chu seeded pakhatna a nih a rinawm a, final hmain an inhmachhawn thei dawn tihna a ni.

Serbian tlangval Djo-kovic pawhin Nadal ngaihdan hi a ṭawmpui. French Open-ah kha chuan roreltu Nadal khan champion lai ni mah se world number 2 a nih avangin seeded pahnihna pek a ni, seeding siam chungchangah chuan number 1 Djokovic kha an dah chungnung zawk.

Wimbledon champion lai Djokovic chuan, "Kalphung an neih hi kan zah tur a ni a, rin loh dan deuha thil a thlen pawhin hriatthiam a ngai. Roger hi Wimbledon champion hnem ber a ni a, a ropui ber. "Player mala duhsakna dawng tur an awm a nih chuan Roger aia phu hi an awm lo ang, season danga an duhsak ṭhin pawh hi a mak lo. Mahse, thil pakhat ngaihtuah tel ngai chu, ani aia an dah hniam tawh hi Rafael Nadal a ni tih hriat a ngai," tiin Nadal chu dahhniam theih a nih bik loh thu a sawi.

French Open vawi 12 champion tawh Nadal hi Wimbledon-ah vawi hnih a champion tawh a, a hlawhtling tawk loa ngaih a ni. Mahse, British mi ten 'Sir' nihna an pek hial Andy Murray nen an champion zat a inang reng! Federer-a'n a vanglai pawha a hneh hleihtheih loh Nadal ṭhat lohna lai ber hi an fachuam ṭhatna ber nen a intluk tawk vel tihna a ni.