Indian football: Buainain zia lam a pan thei lo

All India Football Federation (AIFF) general secretary Kushal Das-a'n Indian Super League chu India rama league sang ber a nih tur thu a sawi a, July 3-a executive committee an neih hunah tihchian a nih tur thu a sawi. 

Kushal Das-a thusawi dengkhawng tak hi I League club ten hahdam takin an dawngsawng hauh lo. Super Cup avanga buaina nei sa an nih bawk avangin AIFF chu court-a kalah hial an vau! Kum 2010 khan AIFF hian IMG chu kum 15 chhung atan inremna an ziahpui a, Indian FA hnenah hian vaibelchhe 700 zet an pe. Kum 2014-ah ISL din a ni a, a tirah tak chuan tournament ang leka khelh a ni. 

Mahse, Kushal Das chuan, "Kan contract ang chuan ISL hi top league-a la ni ang tih a ni a, kum nga a liam ta bawk a, ngaihtuah ṭhat a ngai. Executive committee-in thutlukna a siam ang," a ti. 

AIFF general secretary ṭawngkamin na takin I League club-te a deng nghal dawt a, awm mai mai an tum bik lo. I League club pasarih tun hnaia AIFF-in pawisa chawi tura a hremte chu an inhmukhawm nghal. 

Inhmuhkhawmnaah hian East Bengal, Mohun Bagan, Churchill Brothers, Minerva Punjab leh Gokulam Kerala aiawhte an kal a, Aizawl FC leh NEROCA lamin an ṭhiante thutlukna thlawp mah se inhmuhkhawmnaah erawh an tel lo. 

Aizawl FC technical director Hmingthansanga chuan, "Ni hnih khat thila thlawhtheihna ticket tihfel a harsat tak deuh avangin kan kal hman lo a, mahse I League club dangte nen hian inbiakna kan nei reng. An thutlukna apiang chu kan pawm thlap dawn a ni," tiin Vanglaini a hrilh. 

I League club intelkhawm chuan, "AIFF hian a sawi anga ISL hi top league-ah a puang a nih chuan a rang lamin court kan kal dawn a, tun hma zawng aiin I League club-te hi kan inlungrual lehzual tih an hriat pawh kan duh," an ti. 

Thufingte 15:1-ah chuan, "Chhanna nemin thinur a tikiang ṭhin a..." tiin a inziak - mahse AIFF lamin an la chhiar fuh ve chiah lo a ni mai thei! "Ṭawng huatthlala erawh chuan thinur a chawk tho ṭhin..." tih zawk zawmin na takin I League club an chhanglet nghal. 

Indian FA chuan, "AIFF-in thutlukna mumal tak pawh a siam hmaa I League club-in thuchhuah siama ngaihdan an lo siam hman hi a ṭul loin a hma mah mah a... club neitu ṭhenkhat chuan social media kaltlangin AIFF leh President an bei hial a ni. 

"Indian football ṭhat zawk nan thil ṭul lo sawia inhambuai lo turin I League club te kan hriattir a ni," an ti a, thutlukna an siam turah Asian Football Confederation leh FIFA hruaitute an rawn tur thu an sawi bawk.  AIFF-in I League club-te chhanglet tura hun an mamawh rei lo lutuk hi Indian football ngaihven tute mak tih a tling a, ISL enkawltu Football Sports Development Ltd (FSDL) hming a lan tel vanga che rang niah hial an puh!

AIFF-in 'sual' an chhuah a, I League club-te an awm mai mai bik lo. Chennai City chuan he buaina karah hian AIFF chu executive committee-a anmahni sawm ve turin an ngen. Chennai City hian I League chunga ISL dah tum a nih chungchangah AIFF hi lehkha an thawn a, an executive committee-a 'aw' chhuah ve an duh avangin July 3-a AIFF hruaitute ṭhutkhawmnaah hian tel ve an duh. 

Hei mai hi a ni lo. South Indian club hian I League nomawi an chawi avanga an sum dawn tur chu an la hmuh loh thu an sawi bawk a, AIFF hnenah 'ba' an ṭhing! Minerva Punjab neitu Ranjit Bajaj chuan, "AIFF hian I League club-te sum vaibelchhe sarih aṭanga riat inkar vel an ba mek a ni. FSDL Reliance chuan Indian Arrows player-te chu kum khat chuang hlawh a pe tawh lo bawk," tiin a sawi. 

I League club neitu zingah Minerva Punjab neitu Ranjit Bajaj chu a lungawi lo langsar a ni a, social media lamah na tak takin AIFF a sawisel a, June 23 khan AIFF leh IMG Reliance inremna lehkha chu a pho chhuak hial!

Bajaj-a lehkha phochhuah hi phek 57-a chhah a ni a, AIFF-in sumdawnna thil zawng zawng FSDL kuta a dah dan a inziak a, league thar din a, India rama league sang ber ni tura thuneihna an pek pawh a inziak tel. Lehkhaa a lan danin FSDL hi AIFF chunga thuneitu an ni - mahse Kushal Das chuan hei hi a pha a, FDSL chu sumdawnna lama an thawhpui an nih anga committee ṭhenkhata tel ve chauh an nih thu a sawi. 

Ranjit Bajaj chuan Kushal Das hi IMG tana a thawh hnu lawka AIFF-a lut a nih avangin a mimal hamṭhatna atana hnathawkah a puh bawk a, hei pawh hi Das chuan a pha. 

AIFF secretary chuan, "IMG tana ka thawh lai khan Reliance nen an la thawk dun lo. IMG aṭang hian International Cricket Council (ICC)-ah ka thawk phawt a, ICC aṭang hian AIFF ka pan leh a ni," a ti. 

Ranjit Bajaj erawhin, "Contract-ah hian date ziah lan a ni lo a, hei hi a chhan chu Kushal Das hi IMG Reliance tana thawk a nih vang a ni. October 2010-ah AIFF a pan a, GS a nih thla la lain contract an ziak nghal," a ti. Minerva Punjab neitupa hian Kushal Das chu AIFF a luh hmaa ruahmanna fel tak siam a, chumi hnua contract ziakah a puh - hei vang hian a date pawh an ziak lang ngam loah a ngai a, Kushal Das hausakna turin Indian football chu 'hralh' a niah a ngai. 

July 3-a AIFF hruaitute an ṭhutkhawm hma chuan tun dinhmuna AIFF leh I League club neitute tih theih chu inpuh tawn a ni rih a, Indian football ngainatu tan July 3 a nghahhlelhawm zual sauh.