Hri leng vangin Italian football a buai

AC Milan chu Juventus hmachhawn turin Turin khawpuiah Bus hmangin an zin lut hman a, mahse coronavirus lengin tun hnaiah Italy a tih buai zual avangin Nilaini zana Coppa Italia semifinal khelh tur chu a hun sawn a ni.

Coronavirus hi Asia khawmual-pui aṭanga darh a nih avangin nipui laia neih tur Tokyo Olympic pawh a dinhmun a chiang ta lo. Japan khawpuia neih tur inelna lian hi a hun an sawn emaw, an ṭhulh emaw pawh a ngai hial mai thei.

Football Italia-in a tarlan dan chuan Italy ram chhungah hri leng hi mi 2,263 in an kai tawh. March 2, Thawhṭanni bik khan kai thar mi 248 zet hmuh chhuah niin, hemi ni hian mi 27 laiin an thih phah!

Covid-19 vangin Serie A match 10 chuang chu a khelh hun sawn a ni tawh, Italy hmar lamah hri leng hi a nasat zual avangin Inter Milan chuan Europa League pawh entu nei loin an khelh a ngai hial tawh bawk.

Buaina karah Juve leh Milan te hi inkhel tlang thei tura beisei an ni. Mahse, hriin a tuam nasat lai bial - Lombardy, Emilia Romagna, Veneto, Pesaro, Urbino leh Savona huam chhunga mite chu Allianz Stadium lut ve lo tura tih an ni.

Turin khawpuiah Milan hi inkhel turin an kal hman a, an thlenna tur hotel-ah pawh an innghat hman. Amaherawhchu, Thawhṭannia hri kai thar leh thih pui an tam em avangin Turin thuneitu lam chuan chawpchilh takin inkhel tur hi an sawn.

Coppa Italia semifinal lehlama inkhel tur Napoli leh Inter Milan te erawh chu zanin hian an inlan theih beisei a la ni a, chawpchilh taka a hun sawn leh thut pawh thil awm thei a ni - kar kal ta khan Serie A match 10 khelh tur zinga pali chauh an khel thei a ni.

Ruahman lawk dan chuan July 24 aṭanga August 9 chhung hian Tokyo khawpuiah Olympic 2020 neih tur a ni. Japan Olympic minister Seiko Hashimoto chuan inelna lian an thlen tur hi coronavirus vangin kumin tawp lamah sawn thut theih a nih thu a sawi chhuak.

Seiko Hashimoto chuan, "International Olympic Committee (IOC) nen inremna kan neihah chuan Olympic hi kum 2020 chhunga neih tura tih a ni, ruahman lawk anga thil a kal theihna tur chuan theihtawp kan chhuah," tiin harsatna vang chuan nipuiah kher lo pawh Olympic a neih theih thu a sawi.

IOC leh Japan inremnaah chuan Olympic hi ṭhulh theih a nih thu an lo ziak lawk bawk. IOC president Thomas Bach chuan, "Infiammi zawng zawng te theihtawpa inbuatsaih chhunzawm turin ka duh, inelna hi tluang takin kan neih theih ngei kan beisei," a ti.

Thawhlehni khan Lausanne, Switzerland-ah IOC executive board an inhmukhawm a, thuneitu lam chuan ṭhulh ai chuan a ngai anga kaltlangpui theih an la beisei thu an sawi; chutihrualin infiammi leh mipui himna leh hriselna chu an ngaih pawimawh ber a nih thu an sawi bawk.