Ghana tan Ayew unau

Andre leh Jordan Ayew te unauin Ghana tan goal khat ve ve an khung a, an team chakpui nan erawh a tling tawk lo - Benin nen 2-2 in an inhnehtawk. 

Benin tan Mickael Pote chuan goal hnih a khung a, Ayew unau hming ropuina tur a hliahkhuh - team ṭha zawka ngaih Ghana tan result ṭha a ni lo. Ghana awmna Group F-ah hian 2-0 a Guinea-Bissau hnehtu Cameroon an awm ve bawk avangin Ghana tan knockout round kalkawng a awlsam dawn lo tih a hriat. 

Benin hian rin loh takin minute hnihna lekah Pote hmangin goal hmahruai an khung a, Fenerbahce winger Andre chuan minute sarih hnu lawkah an si phurh a sut. First half tawp nan minute thum chauh a awm tawh tihah Jordan Ayew chuan a 'u' hnathawh ang thawk vein an goal hnihna a khung zui. 

Mahse, Ghana defender John Boye-a'n hun khawhral lamah a rilru a seng hma mah mah a, minute 54-naah hun khawhral zawnga a khawsak avangin yellow card pek a ni. French club Metz player hian first half-ah yellow card a lo hmuh tawh bawk si avangin hnawhchhuah a ni a, kim loin Ghana an khelh phah. 

Benin-in player tam zawk an nih an chhawr ṭangkai vat a, season hman zawh taka Turkish club Adana Demirspor tana league match 33-a goal 16 khungtu Pote chuan a goal hnihna a khung. Hun tawp thlengin goal dang a lut lo a, 2-2 in team pahnih an inhnehtawk. 

AC Milan midfielder ropui ṭhin Clarence Seedorf enkawlna hnuaia khel Cameroon-in first half-ah goal khung lo mah se second half-ah Yaya Banana leh Stephane Bahoken ten goal khat ve ve an khung a, 2-0 in Guinea-Bissau an hneh. 

AFCON champion lai Came­roon hi inelna hmun Egypt an pan hma hian sum chungchangah an ram FA hruaitute nen an inhmu thiam lo a, kar hmasa Zirtawpni khan Egypt pawh hi an pan ve chauh. Mahse, an ram sports hruaitute nen an inbiak avanga Egypt pan Cameroon player-te Guinea-Bissau lakah an talbuai lo a, an chak.